A vawi khat nan Lampard a tlawm

Frank Lampard enkawlna hnuaia a vawi khat nan Coventry City an tlawm a, West Bromwich Albion chu Championship match-ah 2-0 in an ngam lo - Baggies tan an khelmuala thla thum dawn hnua an chak ve lehna hmasa ber a ni thung.

West Brom tan Alex Mowatt leh Karlan Grant ten goal khat ve ve an khung a, Coventry-in a chhanletna tur an nei lo. Baggies-in hnehna an chan avangin table-ah parukna an ni a, playoff khel pha chinah an awm chiah chiah.

Coventry hi table-ah 16-na niin, match 20 khelh tawhah relegation zone an hlatna hi point nga chauh a ni. Championship club hian coach Mark Robins an ban hnuah November 28 khan Frank Lampard an la lut.

West Brom an lenchilh hi Lampard-a hoa league match thum an khelhna chiah a ni - vawi khat an chak a, vawi khat draw neiin, vawi khat an tlawm tawh bawk.

Player a nih laia player langsar leh thiam bik zinga mi Lampard hian coach a nih hnuah beisei a phak lo. Derby County-a hming a chher hnuah Chelsea leh Everton enkawl mah se, club pahnih hian an ban ve ve a, Coventry hmanga hming chher a tum leh mek.