Atletico chak a kaltluang

Diego Simeone-a enkawl Atletico Madrid chak a kaltluang - inelna hrang hrangah match 10 zet chu a zawnin an chak ta a, Nilaini zan khan Champions League-a an beiseina chhi nung turin Slovan Bratislava chu 3-1 in an hneh.

Manchester City boss Pep Guardiola-a'n nipui transfer laia ui loa a chhuahtir, tuna an ngaih em em tak Julian Alvarez chuan a theihna pholangin, Atletico Madrid tan minute 16-naah goal mawi bik a khung a, striker thiam bik ke aṭanga chhuak a ni.

Kum 24 mi Alvarez hian tun season inelna hrang hrangah match 24 khel tawhin, goal 12 a khungna chiah a ni a, assist vawi hnih a nei tawh bawk - City ṭantuten ui takin an thlir ang!

Atletico Madrid tan season duhawm tak hmangtu Antoine Griezmann chuan goal hnih a khung bawk a, a goal khung hmasak zawk hi minute 42-naa lut niin, Spanish club hi 2-0 in hma a hruaipui.

Mikhual team Slovan-in second half ṭantir lamah beiseina an nei thar a, Clement Lenglet chu David Strelec lakah ṭul lo taka foul-in penalty a chawi a, Strelec hian ama penalty hlawhchhuah hi Jan Oblak tana dan rual lohin goal-ah a chantir.

Mahse, Griezmann-a'n a lo la duhtawk lo a, minute 57-naah a goal hnihna khungin, Slovak club lakah Atletico chu 3-1 in a chakpui - French forward hian tun season inelna hrang hrangah match 23 khela goal 11 a khungna chiah niin, assist vawi ruk a nei tawh bawk.

Kum 33 mi forward hian hattrick siam theihna remchang pawh a nei a, mahse, a vanneih zan a ni lo. Slovak club tan Siemen Voet chuan chance nei ve leh mah se, Oblak a paltlang zo lo a, a tawpah 3-1 in Atletico an chak.

Atletico Madrid tan Champions League match ruka an vawi li chakna niin, vawi hnih an tlawm tawh a, table-ah 11-na an ni mek - an hneh tak Slovan Bratislava hi match ruk an khelh tawhah an la tlawm vek a, knockout round an khel thei lo chiang tawh.