Arsenal chakna Saka

Bukayo Saka-a goal hnih leh substitute Kai Havertz-a goal khat hmangin Arsenal chuan AS Monaco 3-0 in an sawp. Mikel Arteta naute hi Champions League last 16 lut turin an dinhmun a ṭha chho ta hle.

Nilaini zan Emirates Stadium-a inkhelah Gunners hian a tir aṭangin kawng tinrengin inkhel an thunun a, striker Gabriel Jesus siamsak chu Saka-a'n a khung bakah, mikhual goalkeeper Radoslaw Majecki-a pet chhuah fuh tawk lo chang fuhin a khung bawk.

England international forward Saka hian a duhtawk mai lo, hun tawp dawn lamah bench aṭanga lut Havertz tan a siamsak bawk - Saka hian goal khung tuma a pet chu German forward hian a lo dang pial lut zawk niin a lang.

Arsenal hian hliam vangin defender chhawr theih loh an ngah a, kum 18 mi Myles Lewis–Skelly chuan bul a ṭan a, tlarhnung sir lehlamah damkawr Thomas Partey dah a ni bawk, inremkhawm chawp viau mah se goal an chhuah lo.

UCL match ruk an khelh aṭangin Arsenal hian point 13 an hmu a, khelh zat inangah an tluk loh chu la chak kim vek Liverpool leh point 13 neitu Barcelona te an ni, an hmabakah Dinamo Zagreb leh Girona te an awm, kum thar lama khelh tawh tur a ni thung.

Mikel Arteta naute hian Premier League lam an ngaihtuah zui a ngai leh rih dawn, Inrinni zan hian tun hnaia beiseina nei thar Everton an lo mikhual dawn a ni.