Chhangphut Field-ah zanah a inkhelh theih ta; Infiammite tan cheng vbc 2.5 ruahman - Chief Minister

Mizoram chief minister Lalduhoma chuan December 11, Nilaini zan khan Champhai Chhangphut Field stadium floodlight a hawng a, Aizawl district pawna football khelmuala floodlight dah hmasak ber a ni.

Floodlight hawnna inkhawma khuallian Lalduhoma chuan, "Mizoram sorkar chuan ‘Ban a kaih’ hnuaiah infiammi theihna nei ṭha te zawng chhuak turin cheng vaibelchhe 2.5 a ruahman tih sawiin, kum thar aṭangin hmalak ṭan tum a ni.

"Sports-ah kal tum dan neiin, tinzawn neiin kan kal zel dawn a, infiamna hmunhma siamte ngaihthah chuang loin, chu'ng hmunhmaa infiam tur infiammite chu ngaih pawimawh zawka nei chungin kal zel kan tum," tiin infiammite hmasawnna tura ruahmanna an neih thu a sawi.

Sports minister Lalnghinglova Hmar chu khual zahawm a ni a, Tetea Hmar chuan, "Sorkar tharin project lian tham kan thawh a kan zawh hmasak ber pawl a ni," tiin Chhangphut Field-a floodlight peihfel a nih chu lawmawm a tih thu a sawi.

Infiamna lama an hmachhawp sawi zuiin Sports Minister chuan, "India sorkarin Olympics 2036 thleng tura ruahmanna a kalpui mek zulzuiin Sports Discipline thlan bikah hmalak tum a ni. ‘Ban a kaih’ hnuaiah infiammi te chu sorkarin an banah a kai dawn a, a bulṭanna atan Champhai District chhunga mi Tuipuiral Games-ah infiamna thar pahnih telh thar tum a ni a, Tuichangral Games-ah pawh infiamna thar pathum telh tum a ni," tiin football mai ni lo, infiamna hrang hranga Mizo ṭhalaite hmasawnna tur an ngaihtuah thu a sawi.

Chhangphut Field-a lighting system hi March 25, 2024-ah thawh ṭan a ni a, November 12, 2024 khan zawh fel a ni. Special Assistance to State for Capital Investment (2023-2024) Scheme hnuaia sum cheng nuai 457 hmanga siam a ni a, RS Construction and Consultancy, Tanhril ten an thawk. Floodlight hawnnaah hian MFA leh Champhai DFA hruaitute an inkhel a, India international hlui Jeje Lalpekhlua pawh MFA tan a inlan a ni.

Lighting System-in a ken tel hrang hrangte

1. Stadium Flood Light: Floodlight hmun liah dah a ni a, a ban san zawng hi meter 30 /feet 98.4 ṭheuh a ni. Ban tinah hian metal halide light hmang loin LED flood light 50 (1000 watts) zel dah a ni a, ban tinah hian a ṭul huna lawn theihna turin kailawn (lift) dah vek a ni.

2. Generator: Floodlight chawmtu atan diesel generator 250 kVA pakhat bun a ni a. Field-in a mamawh dang pavilion leh gallery tih enna bakah sound system chawmtu atan 125 kVA dang bun nghal a ni bawk.

3. Light en ṭhat dan (standard): Champhai Chhangphut Field floodlight en zawng hi a tehna bik lux-meter hmangin field chhung hmun/point 34 laiah teh a ni a, a en ṭhat dan chu chawh rualin 1744 Lux a ni. Hei hi FIFA pawmpui (FIFA Lighting standard) niin, FIFA hnuaia intihsiakna hrang hrang pawh khelh theihna tur khawpa êng ṭha nia ngaih a ni.