World Cup 2034 thlengtu tur Saudi

FIFA World Cup 2034 chu Saudi Arabia-in an thleng dawn a, hei hi FIFA Congress Meeting chuan Nilaini khan an tichiang a, World Cup 2030 chu Spain, Portugal leh Morocco ten an inthlen ṭawm bawk ang.

World Cup 2030 bik hi World Cup kum 100-na tur a ni dawn a, hei vang hian Spain, Portugal leh Morocco ten an inthlen ṭawm dawn bakah, Argentina, Paraguay leh Uruguay-ah te World Cup kum 100 lawm nan, match khat ṭheuh khelh a ni dawn bawk.

FIFA hnuaia member 211-te chuan vote hi thlak vekin, meeting hi video online kaltlanga neih a ni. Mihring zalenna rahbehna ram anga mi tam takin an ngaih Saudi-a World Cup nghah a ni tur hi tam tak chuan an sawisel nasa nghal hle.

Hetihlai hian Saudi Arabia-in football khawvel hmaa inphochhuah an tumna kawnga langsar tak Cristiano Ronaldo chuan, "Saudi hi a changkang em em - stadium leh hmunhma engkim mai hi a ṭha em em vek a, World Cup 2034 hi World Cup ropui ber a ni ang tih ka sawi ngam a ni," a ti.

World Cup 2034 thlen hi Saudi chiahin an dil hrim hrim bawk. October 2023 khan FIFA chuan World Cup 2030 leh 2034 thlen dil theih dan tur a puang a, khawmualpui hrang hrangte hi World Cup inthlen chhawk tura tih an ni.

Hei vang hian World Cup 2026 thlengtu tur USA, Mexico leh Canada an nih avangin CONCACAF ramten thlen an dil ve thei lo a, Qatar-in 2022 an thlen avangin AFC (Asia) chu dan ang chuan 2042 tal a nghah thlen a ngai bawk.

Mahse, World Cup 2030 chu UEFA, CAF leh CONMEBOL-in an thlen dawn bawk si avangin 2034 dil thei hi Oceania leh Asia chiah an awm - Oceania-ah World Cup thleng thei khawp ram an awm lo a, a tawpah chuan Saudi Arabia-in an chang ta a ni.