Ashworth chhuah hun a fuh lo - Amorim

Manchester United head coach Ruben Amorim chuan club sporting director Dan Ashworth-a chhuah hun chu fuh tawk loa a hriat thu a sawi a, hetihrual hian club hmachhawp leh thi dangte a danglam phah loh thu a sawi bawk.

Ashworth hian ni 159 chauh United-ah hun a hmang hman tihin, Pathianni khan Old Trafford a chhuahsan thu a puang a, fans tam tak a barakhaih hle. Amorim chuan, "United ka enkawl ṭantirh aṭangin club thuneitute thlawpna ka hmu ṭha nghal hle.

"Club chief executive Omar Berrada, technical director Jason Wilcox leh Dan-a ngei hnen aṭang pawhin thlawpna ka hmu ṭha hle. Mahse, hei hi football chu a ni a, a chang chuan hetiang hian coach leh player te nen pawh a thleng ve ṭhin reng a ni," a ti.

Amorim chuan sawi zawmin, "Dan-a chhuah hun hi a fuh lo tih chu ka hria a, mahse, a pawimawh ber chu kan tum ramte kan pan zel hi a ni. Kan hmachhawpte a chiang em em, ka ngaiha pawimawh ber chu kan thil tuma kan chian a ni a, mi pakhat awm loh tak avangin thil a inthlak danglam hlawk thei lo," tiin a sawi.

Portuguese coach Amorim-a hoin United hian match nga khel tawhin, vawi hnih an chak a, vawi hnih tlawmin, vawi khat draw an nei. Nizan khan Europa League-ah Viktoria Plzen nen inkhelin, an result kan hre hman lo.