Nulian champion Hmangaihsangi

Mahindra XUV3XO Mizo Inchai Title Fight 2024 hmawrbawwk a ni a, nulian champion lai Lalhmangaihsangi chuan amah chotu Zodinpuii lakah a champion kawnghren a humhim.

LPS Arena, Falkland Venga inchaiah Hmangaihsangi leh Zodini an inchai tawk hle, ruahman sa anga thawh ngana an inchai zawh hnuah an inhnehtawk, thawh khat pek belh an nih hnuah pawh 11-11 niin chak zawk an la awm chuang lo.

A chak zawk ti chiang turin inbanphawi neih a ni a, hetah hian ban phelh loa ṭang rei thei zawk Hmangaihsangi chu chaka puan a ni. Mizoram Wrestling Association (MWA) dan leh hrai angin chak tur hi an ti chiang a ni.

Zodini'n bul a ṭan ṭha zawkin a paih chhuak a, a hnuah Sangi'n bei letin a bawkkhupin a bawhbet hman teuh hle a, hun a tawpin a nang zui. Sangi'n ngam takin a nawr zui a, a kawihtluk hnuah Zodini'n thiam taka bei letin a bawhkhupin vawi 10 chhiar thleng a bawhbet.

Hmangaihsangi tan bawhbeh let a ngai, title hloh mai thei dinhmuna a din laiin a khingpuiin nawr chhuah a tumna lamah a lo bei let a, thiam zeta la pialin Sangi'n la vawi 10 chhiar thleng a bawhbet.

An inbawhbeh danah Zodini lamṭang ten dik tawk lo awm niah an ngai a, video ennawn an dil. Mahse, MWA dan angin dar pahnih bet thlap lo mah se, che thei loa insiam chuan point chhiar theih a nih avangin an pawm.

A tawpah inbanphawi a ni. Kut khing khat koki chungah, khing khat lehlam zak hnuaia rawlh ve vein an inkuahtawn a, inchawi kan tuma an inbeihnaah kut suih phelh hmasa Zodini a chak lo ta a ni.

Sangi'n a vawi khat nan nulian title a humhim a, champion lai a nih vangin Rs 50,000 hlan a ni. Paahnihna leh champion lai chotu ni bawk Zodini'n Rs 30,000 a dawng thung.