A zawnin Milan vawi li an chak

Champions League-ah AC Milan-in a zawnin vawi li hnehna an chang a, point 12 hmuin table-ah 12-naah an awm. Italian club hian Nilaini zan khan Red Star Belgrade an mikhual a, 2-1 in hnehna an chang.

San Siro-a inkhelah Milan chungnung bik lo a, mikhual lamin Andrija Maksimovic hmangin crossbar an pet per hmasa. Mahse, Rafael Leao a rawn lang a, minute 42-naah Youssouf Fofana ball vawrhluh chu Portuguese forward hian box chhungah chiah la thlain ṭha zetin a pet goal.

Milan-in Tammy Abraham hmangin ṭum hnih hmahruai theihna hun nei mah se English striker-in a hmang ṭangkai lo. Red Star Belgrade tan Nemanja Radonjic-a'n minute 67-naah siphurh a sut a, Italian club an talbuai phah hle.

Inkhel inhnehtawk takah Milan an vannei ta zawk a, minute 87-naah Francesco Camarda ball tauh chu keeper Ivan Gutesa-a'n dangin crossbar a per; hemi aṭanga per let hi Tammy Abraham-a'n chiang zetin a pet goal. Milan 2-1 in an chak.