Dortmund khelmualah Barca an chak

Borussia Dortmund khelmualah Barcelona an chak - Nilaini zan khan Champions League-ah Barca hian Dortmund an lenchilh a, vawi hnih ngawt hma an hruai hnuah Dortmund hian sut zel mah se, hun tawp dawna Ferran Torres goal khung hmangin 3-2 in an chak.

Barca tana Raphinha goal khung chu Dortmund hian Serhou Guirassy hmangin an chhanglet a, Catalan club hian Ferran Torres hmangin hma an hruai nawn. Mahse, Guirassy bawk inlarin, si phurh a sut zo.

Team pahnih hi point an insem mai dawn niin a lang hman a, mahse, hun tawp nan minute nga chiah a awm tawh tihah Torres chuan khung lehin, 3-2 in Barcelona hi hnehna a chanpui.

Hansi Flick-a nauten hnehna an chan avangin, table-ah pahnihna dinhmun an luah a, an tan last 16 a hnai sawt. Dortmund erawh a vawi hnih nana an tlawm avangin top 8 pawn lamah an awm a, pakuana dinhmun an luah mek.

Goal lut har

Signal Iduna Park-a inkhelah beisei angin goal kan hmu lawk lo a, first half chhung zawngin a lut miah lo! Barca tan Raphinha chuan hma takah chance duhawm nei mah se, Lamine Yamal-a siamsak chu goal-ah a chantir thei lo.

A hnu lawkah Dortmund-in chance an nei ve a, mahse, Marcel Sabitzer chuan hnai set sawt aṭangin a khung thei lo - a thlirlet ang a, a ui vawng vawng ang tih a chiang.

Second half ṭantir lamah Guirassy chuan goal hmahruai a khungah a inngai hman a, mahse, English player ṭhangduang Jamie Gittens chu a lo offside avangin goal-ah pawm a ni lo.

Minute 52-naah Barca-in goal an khung ta nge nge a, first half-a chance duhawm hlahtu Raphinha chuan Dani Olmo siamsak chu khawhral duh tawh loin goal hmahruai a khung a, Dortmund khelmual a reh.

Goal a sur

Barca-in goal an khung chiah a, Dortmund lamin reh reng an duh bik lo. Kum 17 mi centre back Pau Cubarsi chu Serhou Guirassy lakah foul-in penalty a chawi a, Guirassy hian harsatna nei loin goal-ah a chantir a, 1-1 a ni.

Minute 75-na a ni a, Barca bawkin goal an khung - bench aṭanga luhtir Torres chuan Catalan club tan khelh a phu tih pholangin, hmahruai nawnna goal a khung a, Dortmund keeper Gregor Kobel-a'n Fermin Lopez 'shot' a dan aṭanga per chu goal-ah a chantir.

Mahse, Dortmund-in mahni mualah tlawm an duh bik lo a, an tum lo! Guirassy chuan a chance neih hlah zui mah se, minute 78-naah erawh a khung chiang hle - Pascal Gross-a'n Barcelona keeper Inaki Pena man phak loha ball pein, Guirassy hian goal ruakah a khung.

Hei hi a tawpna erawh a ni lo. Hun tawp nan minute nga chiah a awm tawh tihah Yamal-a siamsak chu Torres hian goal-ah a chantir a, 3-2 in Barcelona an chak.