Manchester City tan kawl êng thei lo
Manchester City-in tun hnaiah chak aiin chak loh an ngah zawk a, Pep Guardiola enkawl team la talbuai ber ṭum a ni. English champion hian Nilaini zan khan Champions League-ah Juventus an hmachhawn a, 2-0 in an hneh lo.
Tunkar tawp hian City-in Eithad Stadium-ah Manchester United an mikhual dawn a, an hmelma team laka point an hloh a nih chuan Premier League nomawi humhim pawh a harsa ang.
An vanduai
Man City hi hliam vangin an buai a, Ballon d'Or dawngtu Rodri inhliam an tuar hle. Hei bakah hian tlarhnung player John Stones, Manuel Akanji leh Nathan Ake te an inkhliam bawk.
Chutihrualin tun hnaia kum 15 chhunga sum hmang tam ber zinga City hi player pahnih khat hliam vanga buai tur an ni lo a, an squad a chhah ṭha tawk. Turin-ah pawh City an chungnung zawk a, goal khungna chance pawh an nei ṭha zawk.
First half tawp hma deuhin Kevin de Bruyne-a ball pek ṭha chu Erling Haaland-a'n goal-ah pet mah se keeper Michele Di Gregorio-a'n a dang. First half-ah goal a lut lo.
Goal 2 chu
Juventus-in minute 53-naah goal khungna chance an nei a, defender Federico Gatti chuan box chhungah bicycle kick hmangin goal-ah a pet a, Ederson-a'n a dang per. Hemi per hi Josko Gvardiol-a'n a pet chhuak ṭha tawk lo a, Manuel Locatelli-a'n vei lam aṭangin vawrh lut lehnghalin Dusan Vlahovic-a'n goal-ah a tauh.
Replay en hma chuan Ederson-a'n a dansak niin a lang a, mahse goalline technology-ah erawh Brazilian keeper-in a dan per hian ball-in goalline a pel hman.
City-in an nawr chhunzawm a, Ilkay Gundogan ball pet ṭha zet chu keeper Di Gregorio-a'n a dang. English club-in an nawr luat an tuar a, an tlarhnung a pawp.
Minute 75-naah Weston McKenie-a'n mual dinglam sira Timothy Weah tlan lut chu ball a pe a, Weah cross vawi khatna an dansak a, vawi hnihna hi a kanga pet lutin McKenie-a'n mawi zetin a bicycle kick lut. City-in an goal chhuah chhanletna an nei lo a, handball vanga an penalty beisei lah referee leh VAR-in penalty turah an ngai lo.
City an buai
Man City hi an chesual palh ngawt a ni tawh lo - tun hnaia an khelh dan thlirin an buai tih loh rual a ni tawh lo. Premier League lamah match li chhung an chak loh zawh hnuin Nottingham Forest hneh mah se an match hnuhnung berah Crystal Palace nen 2-2 in an inhnehtawk.
A zawna Premier League nomawi vawi li chawi thei City hi league-ah palinaah an awm mek a, point 27 hmuin hmahruaitu Liverpool chu point riatin an pha lo. Champions League lamah pawh an chak hnuhnun ber chu October 23-a Sparta Prague 4-0 a an hneh kha a ni.
City hian UCL match ruk an khelh tawhah vawi hnih chauh chakin, chak loh leh inhnehtawk vawi hnih ve ve an nei bawk. Hei vang hian Pep-a hote hi table-ah 22-naah an awm a, last 16 khelh nghal aiin knockout phase playoff an khelh a rinawm tawh bawk.
English champion hian PSG leh Club Brugge an la hmachhawn dawn a, an chak lo ve ve phei chuan playoff khel pha thei lo dinhmunah an ding hial.
Pep a ṭawng chhuak
City boss Pep Guardiola chuan, "Kan khel ṭha takzet. Eng emaw chet sual zeuh chu nei mah ila, ka naute an khelh danah ka chhuang. Italian team-in an thiam ang takin goal venhim tumin an khel a, kan khel ṭha a, result ṭha kan nei lo mai a ni," tiin a sawi.
UCL-a dinhmun sawiin Pep chuan, "Match hnih khelh tur kan la nei a, point khat chauh kan mamawh tawh ka ring. Tun ka dinhmun hi a harsa a, kei chuan tun hmaa kan khelh dan leh nakina kan la khelh dan turah ka lawm," tiin hmalam hun êng tak an neia a ngaih thu a sawi.
City boss chuan sawi chhunzawmin, "Result ṭha kan neih ṭum leh kan neih ṭha loh ṭumah ka in en let ṭhin. Eng result pawh nei ila, ngaihdan nghet tak ka nei ṭhin. Chak tumin kan bei zel dawn a, kan khelh danah lawmna tur awm," tiin a hlauhthawn loh thu a sawi.