Premier League champion an ni a, manager ṭha bik Pep Guardiola enkawl an ni bawk. Mahse, Manchester City hian anmahni cho ngam a, hlau miah loa bei ngamtu an nei, an hming chu 'Arsenal' a ni.
English football inelna sang bera champion tum ngam team pahnih te Pathianni zan khan an intawng a, player kim loa khel tluan Arsenal chuan hun tawp dawnah goal an chhuah avangin Man City nen 2-2 in an inhnehtawk.
Erling Haaland-a goal khung chu dedender Riccardo Calafiori-a'n goal mawi hmangin a sut a, defender tho Gabriel Magalhaes tauh luh chu hun tawp hma chiahin John Stones-a'n a sut, point khat vanga lawm zawk chu Pep leh a naute an ni.
A hmuhnawm
Team pahnih ten hliam vangin an midfielder ṭha pahnih an chhawr thei lo ve ve. Kevin de Bruyne leh Martin Odegaard te chu inkhel entu zingah an tel a ngai, anni pahnih hi tel lo mah se inkhel hmuhnawmna erawh a nep phah chuang lo.
Mikel Arteta-a'n tlarhnung a ti danglam, a khelh tam lohna lamah Jurrien Timber chu Ben White aiah a dah a, mual sir lehlamah Calafiori chuan bul a ṭan thung. Minute 22-naah Italian defender hi Savinho chuan chiang zetin ball a lak khalh.
Brazilian winger hian a hmaa awm Haaland tan a lir lut zui a, Norway international striker hian defender ṭha pahnih William Saliba leh Gabriel te dan hman hmain goal a khung - Premier League goal 100-na hi nasa takin a lawm.
Arsenal ṭantute an phun hman, social media hrang hrangah damkawr Calafiori a khelhtir vanga Arteta demtu pawh an awm hman. Mahse, Spanish manager hian midangte hriat ve loh thil a hria a, a tisual lo chiang hle bawk.
Gunners hian rang zetin freekick an pet a, mual sira awm Gabriel Martinelli chuan insiamrempuiin, box pawna awm Calafiori tan a pe. Italy international hian cool em em maiin, a duhna laiah tak a thlawh lut - keeper Ederson tan dan ngaihna a awm lo.
A pui chhungzawm
Beisei aia rangin Manchester City lamin chhanletna an hmu a, khelmual chhung chauh ni loin a sir mai bakah stadium chhung boruak a nung vet vet hle, goal lawm au thawm leh thinrim au thawm a in chhawk.
Pep-a'n corner chu Arsenal hlauhawmna a ni tih a hria, corner hmasa berah defender Gabriel veng turin Jeremy Doku a ruat, mahse Brazilian defender hian chiang zetin ball a tauh khum a, goal bar hrulah a chhuak hlauh - City an him!
Corner vawi hnihnaah Gabriel bawk buaipui a ngai, tun ṭumah chuan captain Kyle Walker chan a ni ve thung. English defender hian ball lo kal hma aṭangin boruak siam tum viau mah se chiang zetin a tauh luh khum ta zawk - City an him lo.
Etihad Stadium boruak a sang, goal hnihna avanga an lawm hnu lawkah Arsenal an ngui - Leandro Trossard chu yellow card pahnihna vanga hnawhchhuah a ni, chawlhlawk hmain player pakhatin an kim lo tihna a ni.
Trossard hian yellow card a hmu sa tawh a, a hnuah ṭul lo taka ball a pet sawn avangin card a hmu nawn. Trossard thil tih ang chiah titu Jeremy Doku erawh hrem lohin a chhuak thung; North London club lam titi ti tamtu a ni ang.
Bus Park
Manchester City khelmuala inkhel an ni a, hun chanve dang chu Mikel Arteta naute hi a tlem zawk ni chunga an khelh a ngai dawn tihna a ni, duhthlan tur pakhat chiah an nei, an duh thlan theih chu 'Bus Park' a ni.
Thlak zen zen loh Bukayo Saka la chhuakin Ben White dahluh a ni a, a hma lama awm Kai Havertz leh Martinelli te chu tlan let tam tura thupek an ni bawk, goal khung belh aiin a venhim hna a pawimawh tawh zawk.
Arteta naute hi penalty box bulah an ding khawng tlat, hmunawl siamsak loh chu an tum ber a ni. Hla deuh aṭanga shot bak chu Man City meuh pawhin an ti thei bik lo - Walker a pet chu David Raya chuan ṭhazetin a lo dansak.
Defender Josko Gvardiol pawhin ball kang lai shot ṭha viau mah se EPL golden glove kawl mektu Raya a chesual duh bik lo. Phil Foden, Mateo Kovacic, Jack Grealish leh John Stones te an luh pawhin an hlawhtling thei mai bik lo.
A tawp dawnah erawh bench aṭanga lutte an langsar. Grealish-a chuan ball lalutin box chhung hlauhawm laiah a dah a, ven loa awm Kovacic chuan kawh zetin a pet a, defender Jakub Kiwior-a'n dang hram mah se a per chu Stones-a'n goal-ah a chantir. City-in point khat hlu tak an hlawh chhuak.
