AFC an chesual, Chanmari tan beiseina thar

LZ Juice MPL11-ah hmahruaitu Aizawl FC leh Ramhlun Athletic te nimin chhun khan RG Stadium-ah an inkhel a, 1-1 in an inhnehtawk. I League club-in point hnih an hloh avangin Chanmari FC tan league champion nih theihna kawng a inhawng. Chanmarians hian vawiin chhun dar 12:00-a Chawnpui FC an hneh chuan pakhatna dinhmun an luah leh thei ang.

AFC an chesual

Aizawl FC-in Ramhlun Athletic hi an intawn hmasak ṭumin 3-2 in an hneh tawh a, goal nga ngawt a lut. Nimin inkhelah pawh goal chance a tam a, goal erawh a lut lo thung.

I League club hian chak an mamawh tih hriain an nawr na a, first half-ah Augustine Lalrochana'n goalkeeper chauh a hmachhawn hnuah a khung lo. Second half-ah AFC defender C. Zomuanpuia'n yellow card vawi hnihna a hmu a, minute 54-naah hnawhchhuah a ni.

Player 10-a khel chung pawhin Aizawl FC an chungnung a, chutihrualin Ramhlun Athletic hian goal khung theihna remchang an nei. Benjamin Lalnunpuia'n goal ban a pet per a, Isak Vanlalpeka freekick pawh keeper Vanlalhriatpuia'n ṭha takin a dang.

Chutihrualin chance nei ṭha zawk chu Aizawl FC an nei a, hun tawp thlengin chance ṭha an nei. Goal 11 khung tawh Lalbiakdika a vannei tawk lo a, Lalruatthara pawhin hnai tak aṭangin a tauh goal lo. Victor Lalbiakmawia hote Chanmari result-ah an innghah leh a rih a ṭul dawn.

A harsa dawn

Chanmari in an khelh hmabak match thum an chak vek chuan league champion an ni dawn a, mahse an hna hi a harsa dawn. Chanmarians hian I League 3 final round an thlen avangin Lalsangzuala Hmar hoin Kolkata-ah an thang mek a, vawiinah erawh kim loin Chawnpui an hmachhawn dawn.

Season liam taa Electric Veng FC enkawltu Francis Rambeiseia'n Chanmari hi a enkawl dawn a, senior player 13 an awm dawn. MPL Board-in a phalsak angin season liam taa Chanmari Under 17 player ṭhenkhatin an telpui bawk ang.

Chutihrualin Chanmari hi dah hniam theih an ni lo a; Mizoram goalkeeper RS Lallawmzuala, 2013 I Day Football best player Lalnunzira leh I League thlenga tawnhriat nei ṭha Vanlalduatsanga ten an ho thei dawn a, Chawnpui hneh thei tur team an ni.

Chawnpui hian coach Lalrindika Hmar hnuaiah harhtharna an chang a, round 10 thlenga pasarihnaa awm kha palinaah an awm hial. MPL9 champion hian semifinal khelh ngei an tum a, chuvangin Chanmari kim loa laka point thum hlawhchhuah hi a pawimawh takzet.