League Cup: Premier League club lian inlan dawn

English football-a inelna ngaihhlut hlawh, League Cup chu zanin hian khelh chhunzawm a ni leh dawn ta - Premier League club langsar inlan tur an awm nual a, inkhel en a châkawm leh dawn.

League Cup hi third round a ni tawh a, Premier League club zingah Leicester City, Manchester City, Chelsea leh Aston Villa an inlan dawn a, hetihlai hian Newcastle United inkhelh hun erawh sawn a ni.

Magpies hi League Two club AFC Wimbledon khelmuala leng tur an ni a, mahse, Inrinni zan aṭanga ruah a sur nasat avangin Wimbledon khelmualah tui a tling nasa - tun dinhmunah chuan inkhelh luih chiah an ngai rih lo a ni.

Premier League club la dam zingah Arsenal, Liverpool leh West Ham pawh an la inlan rih dawn lo. Nilaini zanah Arsenal hian Bolton Wanderers an mikhual dawn chauh a, Anfield-ah Liverpool leh West Ham an inkhel bawk ang.

A hautak dawn

Manchester City-in zanin dar 12:15-ah Watford an mikhual dawn a, Arsenal nena inkhel chau hlim City tan a awlsam lo ang tih a chiang - hei vang hian Pep Guardiola-a'n player chhawr rim loh zawk a chhawr a nih pawhin a mak lo ang.

City hian tun hnai ni kua chhungin match thum an nei a, a hautak em em vek bawk - Premier League-ah Brentford mikhualin, 2-1 in an hneh a, ni nga hnu lawkah Champions League-ah Inter Milan lenchilhin, 0-0 in an inhnehtawk.

Chawlh pawh an chawl hahdam hman lo ang a, tih tur a nih laiin Pathianni zan khan Premier League champion tura an elpui Arsenal an mikhual zui a, hun pek belha an goal hmangin an draw hram.

City danglamna erawh an squad a chhah tawk hi a ni a, Championship club hneh tur khawp squad chhawr rim loh chu an la nei. Pep-a hoin City hian 2018-2021 inkarah khan a zawnin champion nomawi an chawi tawh a, season hmasa khan third round-ah Magpies ngam loin an tla thung.

Chelsea beiseina

Coach thar Enzo Maresca hnuaia indinthar mek Chelsea chu zanin dar 12:15 vek hian an inlan dawn a, an mikhual tur hi League Two club Barrow A.F.C an nih avangin London club tan harsatna awm lo tura ngaih a ni.

Barrow hi League Two table chung berah an awm mek a, mahse, anni ang tan chuan Stamford Bridge-a lenluh chu a 'u' hret - an chak a nih chuan football-a thil thleng mak zinga chhiar tel ngai tur a ni ang.

Blues hi nipui bazara player an lei nasat avangin tam takin fiamthu thawh nan an hmang a, an match hmasa berah Manchester City chu 2-0 a an ngam loh bawk avangin nuihzat an nihna chu belhchhah a ni.

Mahse, Maresca hnuaiah an khelh dan a nghet tawlh tawlh a, an system a mumal ṭan - City laka an tlawm hnuah league match li khelin tlawm an nei leh tawh rih lo a, match hnuhnung berah pawh team ṭha West Ham chu khualmualah 3-0 in an sawp.

Foxes & Villa

League Cup-ah hian Premier League club, European football-a inlante chu third round aṭangin an inlan chauh a, Villa pawh Champions League an khelh avangin zanina an inkhel tur hi tun season League Cup-a an inlan hmasak ber tur a ni a, Foxes erawh zan hnihna tur a ni.

Leicester hian third round khel turin League Two club Tranmere Rovers chu 4-0 in an sawp a, Premier League-ah erawh an ropui lo hle - match nga an khelh tawhah an la chak zo lo vek a, vawi hnih tlawmin, vawi thum draw an nei.

Zanin dar 12:15-a an hmachhawn tur erawh fourth division club Walsall an ni a, chak an beisei ang. Aston Villa-in zanin dar 12:30-ah Wycombe Wanderers an lenchilh dawn a, Unai Emery-a'n chhawr rim loh zawkte a luhtir a rinawm.

Villa hian league-ah match nga khel tawhin vawi khat chiah an la tlawm a, an ngam loh pawh champion beisei Arsenal an ni. Champions League match hmasa berah pawh Young Boys (3-0) an hneh nghal a, Wycombe lakah beisei an tisang ang.