Blasters-in East Bengal hneh

Nipui transfer laia sum hmang na tak East Bengal an chak thei rih lo a, Pathianni zan khan khualmualah Kerala Blasters chu 2-1 in an ngam lo - league match hnih an khelh tawhah chak an la nei lo.

East Bengal hian Vishnu PV hmangin minute 59-naah hmahruaina goal an khung a, mahse, South Indian club-in Noah Sadaoui leh Kwame Peprah hmanga chhangletin, 2-1 in hnehna an chang ta daih.

Kolkata club tan an hmelma Mohun Bagan aṭanga an lakluh, lakluh dan felhlel awm avanga inlan lawk thei lo, a hremna an hlihsak leh tak Anwar Ali chuan a league match hmasa ber a khel a, mahse, a team a chakpui zo chuang lo.

Blasters tan Freddy Lallawmawma chu bench aṭangin a lut a, East Bengal lamah Hyderabad aṭanga an lakluh Mark Zothanpuia chuan a match hmasa ber a khel a, hrem vangin Lalchungnunga a inlan thei lo thung.

Nizan khan Mohun Bagan leh NorthEast United an inkhel a, an result kan hre hman lo - zaninah ISL inkhel a awm lo ang a, Nilaini zan aṭangin an khel ṭan leh ang.