Barca an chak, Ter Stegen a inhliam

Barcelona-in Pathianni zan khan Villarreal 5-1 in an sawp a, Hansi Flick hnuaiah La Liga match ruk khel tawhin an la chak vek. Catalan club hian El Madrigal-ah inkhel thunun mah se goalkeeper Marc-Andre ter Stegen a inhliam. Germany international keeper Ter Stegen hi khup hliam vangin zawnchhuah a ni a, tun season-ah a inlan theih a rinawm tawh lo.

Robert Lewandowski-a'n goal hnih a khung a, penalty a hlah thung. Raphinha pawhin goal hnih a khung a, Pablo Torre-a'n goal khat a khung ve bawk. Catalan club hian 5-1 ngawtin hnehna chang mah se inkhelh tir lamah chuan an talbuai ve hle.

Ter Stegen hi first half injury time-ah thlak a ni a, 2-1 a ni tawh. Bench aṭagna lut Inaki Pena hian Arsenal forward hlui Nicolas Pepe goal khung tur chu ṭha takin a dang. Pena hian dang lo se, Barca hi talbuai ve thei an ni.

Mahse, inkhel pumpui thlir chuan Barca hi team ṭha zawk an ni a, kum 17 mi Lamine Yamal-a'n woodwork a tih per bakah Raphinha goal khung tur pawh goal line aṭangin an pet chhuak.

Catalan club hi La Liga-ah an che ṭha a, Champions League-ah erawh Monaco hneh loin bul an ṭan. French club an hneh loh ṭum hian Ter Stegen hi a chesual a, Germany no. 1 keeper hi tlarhnung aṭanga ball sem a ṭhat tawk loh avangin sawiselna pawh a dawng hnem hle.

Mahse, Yellow Submarine laka khup a tih nat hnuah erawh a diriam a ni ta bik lo. Hansi Flick chuan, "A hliam na takzet. Chhuata a mut zal khan a khup dik lo lai kha a hmuh theih nghal," tiin a hliam nat thu a sawi.

Barcelona hian Ter Stegen thlakna tur goalkeeper an mamawh dawn a, mahse contract nei lo player an nih a ngai thung. Contract nei lo zingah Real Madrid keeper hlui Keylor Navas, Liverpool keeper hlui Loris Karius leh Czech Republic goalkeeper Jiri Pavlenka te chu hming langsar an ni.

Zanin hian La Liga khelh chhunzawm a ni dawn a, champion lai Real Madrid pawh an inlan dawn. Carlos Ancelotti hote hian an mualah Alaves an mikhual ang. Los Blancos hian tun season-ah tlawm la nei lo mah se Mallorca leh Las Palmas te nen an inhnehtawk avangin an elpui Barca hi point liin an pha lo.