Verstappen hmaah Norris a thleng

Max Verstappen hi champion leh chiang tura ngaih a ni a, season bul a ṭan danah pawhin a nemnghet - mahse tun hnaia Lando Norris chet dan erawh Max leh Red Bull tan ngaimawh tham a tling takzet ta.

Pathianni zan khan Singapore Grand Prix tlan niin, a hamsa ber aṭanga tlan ṭan McLaren driver Norris hi pakhatna a ni a, a hnungah Verstappen a thleng thung.

British tlangval Norris chuan, "Intlansiak nuam leh ropui, mak bawksi chu a ni. Inhnaih tak taka tlan chang kan nei a, chutiang boruak kara hetiang dinhmun thlen theih hi a lawmawm, inrintawkna nasa tak min siamsak bawk," a ti.

Driver championship lamah Norris hian a chunga awm Verstappen a phak lohna chu point 52 a ni mek. Tun season atan intlansiak hmabak paruk a la awm, heng zinga pathumah hian point hmuh belh theihna 'Sprint Race' a awm dawn - inelna boruak a sang chho dawn tih a chiang.

Dutch tlangval Verstappen chuan, "Kei leh ka team chuan pakhatna nih kan duh ṭhin a, pahnihna nih hi lawmawm mah se kan lungawina a ni ngai lo. Chuvangin kan hmabakah chuan a ṭha ber nih kan tum leh tawh tur a ni ang," a ti.

Khawvela car intlansiakna sang ber Formula 1 hi October 20, Pathianni zanlai hian Circuit of the Americas-ah United States Grand Prix an tlan leh ang.