Taekwondo-ah Mizo tlangvalin gold medal a la

India Taekwondo World Championship selection chu September 20-22, 2024 chhung khan Nashik, Maharashtra-ah neih a ni a, Armed Veng South tlangval H. Vanlalfela'n gold medal a la.

Hrangbana College zirlai H. Vanlalfela hi Gidae Taekwondo Academy, ITI Veng tan a khel mek a, inelna neih zawh takah hian Champion of Champions 2024-ah telin, senior individual competition-ah gold medal a la.

H. Vanlalrova fapa H. Vanlalfela hian gold medal a lak avangin World Taekwondo Championship, Hong Kong-a neih turah male category, freestyle individual Poomsae-a tel turin a tling.

Armed Veng South tlangval hian June 28-30, 2024 chhunga Cuttack-a neih National Championship-ah Recognise Team competition-ah gold an lo la tawh a, tun ṭumah erawh player pakhat a inhliam avangin recognise team-ah tel thei lo. Cuttack-a inelna vekah hian Vanlafela hian individual freestyle poomsae-ah silver medal a la bawk.