Hearts-in Naismith an ban

Scottish Premiership club Hearts chuan coach Steven Naismith chu match riat zet a zawna an tlawm avangin an ban a, club CEO Andrew McKinlay chuan, "Kan kal zelna turah hmasawnna tur hmuh tur a awm rih lo a ni," tiin an coach an ban chhan a sawi.

Everton attacking midfielder hlui Naismith rual hian a assistant pahnih Gordon Forrest leh Frankie McAvoy te chu ban an ni a, Hearts B team head coach Liam Fox chu manager lailawk a ni ang.

Kum 38 mi Naismith hian April 2023 aṭang khan Hearts hi coach lailawk niin a enkawl ṭan a, pathumna ni chungin season hmasa kha a kharpui. Mahse, beiseina sang tak nen season bul ṭan mah se, tun season-a league match ruk an khelh tawh aṭangin point khat chiah an la nei.

Hearts hian an match hmasa berah team ṭha Rangers chu 0-0 in an inhnehtawkpui a, mahse, a hnu league match ngaah an tlawm vek a, a kar laka an khelh League Cup leh Europa League playoff round match hnihah an tlawm ve ve bawk - in ban lohna chi pawh a ni chiah lo!