SYS lakah Police an tho chhuak

Nimin tlai LZ Juice MPL11-ah SYS FC-in Mizoram Police lakah 2-0 in hma hruai mah se tawnhriat ngah Police lakah an ṭangtluan thei lo, 2-2 in inkhel a tawp. Police-in point khat hlu tak an hlawhchhuah zarah point 17 hmuin semifinal an hnaih zel a, SYS erawh point hnih an hloh avangin a sang pali zinga inhlankaina hun ṭha an bawhpelh.

RG Stadium-a inkhelah SYS-in bul an ṭan ṭha a, minute khatna lekah Andreas Lalhmingmuana'n a tlawh goal nghal. Lunglei club an che ṭha zel. Minute 36-naah Nicholas Ngurthansanga'n box pawn aṭangin kawh zetin goal kilah a pet lut a, F. Lalmuanawma thlaktu Malsawmkima'n a en liam.

Second half-ah erawh Police ṭha zawk an inlar a, chak tumin an nawr bet ta thung. Minute 66-naah Isaka cross chu F. Lallawmkima'n a tauh lut a, minute 77-naah captain Lalfakzuala freekickchu Isaka'n mawi zetin a tauh pial lut.

Mizoram Police-in goal dang khung belhna remchang pawh an nei a, an khung belh thei lo. Hun tawp hma chiahin SYS captain F. Malsawmtluanga freekick petin cross bar a per a, Police an vannei ta zawk.