An ramah Bastianini a chak

Enea Bastianini chuan Italy rama tlan zawh tak Italian Grand Prix-ah hnehna a chang a, bike intlansiakna sang bera champion a beiseina mei mit ṭep tawh chu a chhawm nung ve leh ta.

Pathianni tlai khan Emilia-Romagna-ah intlansiak hmuhnawm kan hmu, kum 26 mi Bastianini hian lap hnuhnung berah Jorge Marti a tlan pel a, a team Ducati chuan a vawi 100 nen MotoGP huangah hnehna an chan theih phah ta chiah a ni.

Pramac Racing duhlai Martin hi pahnihnaah a thlang a, amah hnaih bertu Francesco Bagnaia chu lap sarih tlan hmabak la awm laiin a chesual a, champion lai Bagnaia leh Martin inkarah point 24 a awm leh ta.

Tun season atana a vawi hnih chakna Bastianini chuan, "A tir aṭangin Jorge kha a tlan ṭha em em mai a, a nihna takah chuan tlan pelh theih loh tluk a ni, a tawpah khan engkim huamin hma ka la, a hlawhtling hram," tiin a sawi.

World champion vawi ruk ni tawh Marc Marquez pawh a tlan ṭha chhunzawm zel, intlansiak hnuhnung pahniha chak thei Marquez hi tun ṭumah pawh pathumna a ni leh a, atan dawhsan (podium) lawn chin nih phak hi thil ṭha a tling.

Khawvela bike intlansiakna sang ber hi tunkar tawp hian an tlan chhunzawm leh dawn. September 29, Pathianni hian Indonesia-ah an tlan dawn, intlansiak 20 awm tur zinga 15-na a ni ang.