Leverkusen an chak, Dortmund an mualpho
Bundesliga champion Bayer Leverkusen-in an nomawi humhim ngei an tum tih pholangin an chak a, VfL Wolfsburg lakah minute 93-naah chakna goal an khung. 3-2 in an mikhual hi an hneh a, league match li aṭangin point kua an nei.
Xabi Alonso enkawl team hian 3-2 a an hnufual hnuah goal hnih an khung leh a, 4-3 in a chak zawk an ni daih. Match li an khelh tawhah vawi thum an chak a, season hmasa tluana tlawm nei lo team hi vawi khat erawh an tlawm tawh.
Hetihlai hian Borussia Dortmund an mualpho chiang hle. Khualmualah VfB Stuttgart chu 5-1 in an ngam lo. Match liah point sarih an nei a, tun season-a an tlawm vawi khatna ni mah se, goal nga ngawt an chhuah avangin an mualpho.
Bundesliga-ah hian match li khelh tawha la chak vek Bayern Munich chu hmahruaitu an ni mek a, Leverkusen, SC Freiburg leh Eintracht Frankfurt ten point kua ṭheuh neiin an dawt.
A tawpah Leverkusen
Season hmasa lama hun pek belha goal khung thei tak Leverkusen-in an zia an kalsan lo. Mikhual Wolfsburg hian Nordi Mukiele (own goal), Sebastiaan Bornauw leh Mattias Svanberg hmangin vawi thum ngawt hma an hruai.
Champion team hian Florian Wirtz, Jonathan Tah leh Piero Hincapié hmangin si phurh an sut zel a, team pahnihin point an insem mai dawna a lan hnuah chakna goal an khung zui - hun pek belh minute thumnaah Victor Boniface chuan chakna goal hi a khung.
Leverkusen-in hnehna an chang a, mahse, an khelh danah player pawimawh, midfielder Granit Xhaka a lawm lo. Swiss midfielder chuan, "Hei hi kan tan inenfiahna tur ni rawh se - hetianga kan khelh chhunzawm zel chuan a chi loh ang.
"Tlarhnung kan veng ṭha tawk lo a, hetiang ang level-a thleng atan chuan a nep lutuk hret!Top team chuan minute kaw chhung lekin goal hnih a chhuah thiang lo," a ti a, tlarhnung an ven danah a lawm lo.
Dortmund an zawr
Borussia Dortmund-in Stuttgart an hmachhawn hmain league match thumah tlawm an nei lo a, Champions League-ah 3-0 in Club Brugge an sawp bawk. Mahse, Bundesliga an khelh leh meuh chuan goal nga an chhuah a, goal khat chiah an khung!
Stuttgart tan Deniz Undav a chet ṭhat chhunzawm a, goal hnih a khung - ani bakah hian Ermedin Demirovic, Enzo Millot leh El Bilal Toure ten goal khat ṭheuh an khung a, Dortmund tan Serhou Guirassy chuan goal khat a khung ve bawk.
Season hmasaa Stuttgart striker ṭha Guirassy-a'n a club hlui lakah goal a khung a, mahse, goal a khung meuh hi chuan goal li an chhuah fel der tawh a, club lian zawk Dortmund tan comeback a harsa tawh.
Dortmund leh an ngam loh VfB Stuttgart te hian point sarih ve ve an nei a, match liah vawi hnih ve ve chiah an la chak - mahse, season ṭantir chauh a la ni a, thawnthu a la inthlak danglam thei.