Inter hnehtu Milan

Hun tawp dawna Matteo Gabbia goal khung hmangin AC Milan chuan an hmelma Inter Milan an hneh a, ban mai theih dinhmuna ding an manager Paulo Fonseca dinhmun an sawhnghehsak tura ngaih a ni.

Tun ṭum San Siro-a inkhelah hian Inter hi mualneitu niin, stadium chhungah fans an ngah zawk. Mahse, minute 10-naah Milan tan Christian Pulisic chuan goal khungin mikhual team hma a hruaipui a, chawlhlawk hmain Federico Dimarco chuan a sut ve thung.

Second half-ah Milan hian penalty hlawhchhuakah an inngai, mahse Inter captain Lautaro Martinez-a hand ball chu VAR hmanga ennawn a nih hnuah penalty hi sut leh a ni.

Team pahnih ten goal khung zui an harsat a, striker Tammy Abraham chuan remchang nei mah se goal zawnah a pet lo. Hun tawp dawna Gabbia-a tauh erawh Inter goalkeeper Yann Sommer tan dan theih a ni lo.

Inter manager Simone Inzaghi chuan, "Tun ṭum atan chuan Milan khan chak an phu zawk, kan khingpui hmachhawn dan kha a dik tawk lo deuh a ni. Tlarhnung kan rem phui tawk lo a, kan thawkrim tawk lo deuh bawk," a ti.

Champion lai Inter tan nomawi humhim a awlsam dawn lo - Torino, Napoli, Udinese, Juventus leh Empoli te hnuaiah an awm mek, team dangin season bul an ṭan fuh avangin an hnai a hautak chho dawn hle.

Milan tan erawh result lawmawm bik a ni thung, tun hnaiah an chet ṭhat loh avangin boruak danglam an mamawh. An striker hlui Zlatan Ibrahimovic chuan Milan Derby an khelh dawn hian team a tlawh a, player ho titi puiin training hun pawh an sawn tlai phah hial.

AC Milan coach Paulo Fonseca chuan, "Derby a ni a, hun eng emawti chhung chu Milan hian chak ni hmel kan hmu tawh lo tih ka hre bawk. Tunah chuan ka nauten an tih tur dik tak tiin result duhawm kan nei ta.

"Tlarhma lama Tammy Abraham leh Alvaro Morata te kan dahkawp khan khelh dan phung kan thlak hlawh tihna a ni hran lo, mawhphurhna hran siamsak an ni a, team tana ṭha turin an khel dun," tiin a sawi.