Premier League-a khualmuala an match hnuhnung pangaah Liverpool-in match tinah goal thum tal an khung ziah a, tun season inelna hrang hrangah tlawm an la nei lo bawk.
Mahse, Pathianni zanah erawh thawnthu a danglam ta - awihawm loh khawpa season hmang ṭhatu West Ham chuan an mikhual fak hlawh hi 3-2 in an lo tlawm a, kut ruakin Liverpool an haw.
Hammers tan Alisson (own goal), Pablo Fornals leh Kurt Zouma ten goal khat ṭheuh an khung a, Reds tana Trent Alexander-Arnold leh Divock Origi te goal mawiin team a chhanhim zo lo.
Liverpool an tlawm avangin table-ah palina an ni a, pathumnaah West Ham an chho ta thung - Jurgen Klopp-a naute hi pangana Arsenal-in point hnih chauhin an thlau tawh a, international break zawha an match hmasa berah team pahnih an intawng dawn!
Alisson - nang vang
West Ham khelmualah tha tho takin Liverpool an leng lut a, mahse, minute lina lekah goal an chhuah nghal - Fornals-a corner aṭanga ball kal chu Alisson-a'n a kal dan tur a chhutsual a, Angelo Ogbonna-a'n a lo tihbuai bawk si avangin an lamah a lut daih.
Vawi tam Liverpool lo chhandam tawhtu Alisson a chesual a, a hlawkna teltu chu Hammers an ni. Liverpool-in si phurh sut tumin nawr ṭhin mah se Hammers tlarhnung an ding khawng tlat a, goal chhuah loh chu thupuiah an nei.
Mahse, minute 41-naa Arnold-a goal mawi bik erawh an dang zo lo - Mohamed Salah nen freekick pet turin an ding dun a, fing taka ball an inpek hnuah English right back hian goal-ah a pet a, goal mawi bik a ni.
Team ṭha zawk Liverpool-in an si phurh an sut a, Kop ho chuan point thum lo chu an mitthla tawh lo ang tih a chiang. Mahse, goal an khung hnuah Liverpool an khel ṭha sawt chuang lo a, midfield chu awlsam taka Atletico Madrid hnehtu tih awihawm loh khawpin a pherh.
Buai a zual
Hammers-in goal an chhuah hnuah draw ringawt an duh lo tih an pholang a, Craig Dawson chuan woodwork a rawn tauh per dawp - Reds ṭantute thin phu a rang a, an awm hle hle thei lo.
Minute 67-naah Fornals-a'n a khung ta nge nge - Liverpool midfield khelh ṭhat loh zar zoin Jarrod Bowen chuan ṭha takin ball a khalh lut a, Spanish attacking midfielder Fornals tana khung turin a siamsak.
West Ham-in an goal hnihna an khung danah Liverpool midfield chu dem tur ber an ni a, Alisson-a'n a hna a tlin tawk lo bawk - Fornals-a chance neih vawi hnihna erawh Alisson hian ṭha takin a dang thung.
Hammers-in an la duhtawk lo! Minute 74-naah Kurt Zouma chuan corner aṭanga ball kal chu a tauh goal ve leh a, minute 80 a tlin hmain chak tur a chiang der tawh.
Vanduai Liverpool?
Liverpool tan Origi chuan minute 83-naah class zetin goal a khung ve leh a, goal dang erawh Liverpool-in an khung thei lo a, kut ruakin London Stadium an lut a, kut ruak vekin an haw.
Jurgen Klopp-a nauten an khel ṭha tawk lo a, an vanduaina zawn thlir erawh chuan vanduai inti thei an ni - zan dang ang ni se, an goal class pahnih kha chakpui tham a ni a, mahse, West Ham khelh ṭhat zan an tawng.
Chu mai a ni lo - hnai set sawt aṭanga Sadio Mane volley chu West Ham keeper Lukasz Fabianski chuan ṭha zetin a dang a, Arnold-a freekick aṭanga ball kal Mane-a'n a tauh goal lohte chu uiawm tak a ni.
Liverpool-in Premier League-ah champion an tum chuan Chelsea leh Manchester City te an el tih an hriat a ṭul a, tlarhnung leh midfield-in insiamṭhat hna an thawh vat loh chuan league match 11-a an point hloh zat a tam hret tawh.
Referee vang vek!
Liverpool an khel ṭha tawk lo a, mahse, chu aia Klopp-a rilru luah zawktu erawh referee chet dan a ni - Reds goal hmasa zawk chhuah danah Ogbonna chu a foul-ah a ngai a, referee-in goal hi a pawm thung.
Klopp chuan, "Ogbonna kha Alisson lakah a foul chiang hle. Thil thlen dan leh Ogbonna leh Alisson inhnaih dan kha en ila, engtinnge foul a nih loh theih zawk? Thutlukna mak tak a ni," tiin a lawm lo hle.
German coach hian Jordan Henderson laka hlauhawm taka foul Aaron Cresswell chu hnawhchhuah turah a ngai bawk a, hetihlai hian a kiua Ogbonna nghawktu Diogo Jota-a'n hnawhchhuah a tawk lo kha a vannei viau bawk.
Klopp chuan, "Cresswell khan ball chu a tawk fuh ngei a, mahse, a chet dan kha a hlauhawm lutuk a ni. Red card dik tak a ni a, sawi buai tur a awm lo," a ti a, a lawm lo hle.
First half-ah inkhel kan thunun a, si kan phurh hnuah pawh ṭha takin kan chhanglet thei. Second half-ah West Ham-in counter leh set-piece aṭangin an rawn khung a, kan thunun tur anga inkhel kan thunun chhunzawm loh avangin kan tuar - dawhtheihna kan tlachham niin a lang. - Jurgen Klopp, Liverpool manager
Top four team chu tu pawh ni se, anni nena inel ka duh a, he chona hi ka player-te hmaah ka chhawp a, season tawpah a sang pali zinga kan awm ka beisei. Liverpool-in tun hnaiah an khel ṭha em em a, hei vang hian kan tan chuan vawiin kha chona a ni. Mahse, harsatna karah pawh kan tho zel a, counter-attacking leh corner kick-in min pui viau bawk. A êng zawnga thil thlir tlat ṭhin ka ni a, mahse, nomawi chawi tur erawh chuan kan la ṭha tawk lo. Season hmasa khan point hnih lekin Champions League kan phak lo a, chu chu tuna kan tum chu a ni. Kan result avanga phul chiam kan tum lo a, mahse, a nuam ve khawp mai.
- David Moyes, West Ham manager
