Inter leh Milan an inhnehtawk
Italian club lian pahnih Inter Milan leh AC Milan te chu Pathianni zan khan 1-1 in an inhnehtawk. Milan hian Serie A hmahruaitu nih theihna remchang an bawh pelh a, champion lai Inter tan nomawi hum beiseina a la nung ve bawk.
Inkhel dangah Napoli leh Hellas Verona te 1-1 in an inhnehtawk ve bawk. Naples club an chak zawh loh avang hian Milan hian hnehna chang ni se la chuan hmahruaitu an inthlak thei dawn, mahse tunah chuan Napoli leh Milan ten point 32 ve ve an nei ta zawk.
Inhnehtawk
San Siro-a inkhel ni mah se Inter chu mikhual team an ni, mikhual lam hian minute 11-na lekah Hakan Calhanoglu-a penalty chhuih luh hmangin hma an hruai a, mahse goal luh aṭanga minute ruk hnu lekah Stefan de Vrij chuan anmahni lamah a ti lut.
Inter lamin penalty aṭangin bawkin goal khung theina remchang an nei, mahse striker Lautaro Martinez-a pet chu keeper Ciprian Tatarusanu-a'n a lo dansak. Milan tan Alexis Saelemaekers-a'n goal ban a tih per bakah, a per lo let hi Franck Kessie chuan ho ang reng takin a hlah.
Second half-ah Milan hi team ṭha zawk an ni a, remchang pawh an insiam zauh zauh. Zlatan Ibrahimovic-a'n ṭha taka freekick a pet chu Samir Handanovic-a'n a lo dansak hram, remchang dang hmu zauh ṭhin mah se goal an sual chhuak zo lo.
Hmabak a la awm
AC Milan manager Stefano Pioli chuan a naute hmasawn dana a lawm thu a sawi a, chutih rualin an ṭhat dan ber an la thlen chhuah loh avangin hmabak an la neih thu a sawi bawk.
Pioli chuan, "Inter Milan kha team ṭha leh khawng tak an ni a, mahse keini pawhin anmahni anga ṭha kan ni ve tho tih kan lantir. Hnehna chan phu khawpin kan khel ṭha a, mahse vanduai vang chauha point thum hmu lo kan ni.
"Ṭul lo takin penalty kan chawi a, amaherawhchu kan tihsual siamṭha tura theihtawp kan chhuah leh dan kha a lawmawm lai chu a ni. Tunah hian kan nih tur ang zatve vel chauh kan la ni," tiin an thlen tur ang an la thlen loh thu a sawi.
Chak kan phu
Inter Milan manager Simone Inzaghi chuan chak phu zawk an nih thu a sawi a, point khat ni loin point thum hmu zawk tur an nih thu a sawi. Italian manager hian a naute penalty chhuih dan chungchang a sawi fiah bawk.
Inzaghi chuan, "Tun hnai kan match hnuhnung paruk zingah Juventus leh Milan kan inhnehtawkpui. Milan leh Napoli hi tluang takin an kal mek a, anni el phak tur chuan keini lam pawh kan chetsual a thiang bik lo.
"Penalty pet dan chungchangah chuan buaina tur a awm lo. Lautaro Martinez leh Calhanoglu bakah Ivan Perisic pawhin a pet thei. Hakan khan a hmasa zawk kha pet a dil a, a hnuah Lautaro hun a thleng ve thung," tiin Romelu Lukaku chhuah hnuah penalty pettu pathum an neih thu a sawi.
Roma an tlawm
Pathianni zan Serie A inkhel dangah AS Roma chu Venezia lakah 3-2 in an tlawm. Jose Mourinho nauten kai thar an ngam loh avangin Serie A nomawi beiseina a tlem tial tial a, a sang pali zinga tel phak pawh a awlsam lo ang.
Venezia tana Mattia Caldara goal khung chu Roma lamin Eldor Shomurodov leh Tammy Abraham te hmanga chhang letin 2-1 in chawlhlawkah hma an hruai, mahse second half-ah mualneitu lamin Mattia Aramu leh David Okereke te hmangin an khung belh.
Roma hi inelna hrang hranga an match hnuhnung pasarih zinga paliah an tlawm. An chak lohna zingah hian Europa Conference League lama Bodo/Glimt an ngam loh pawh a tel, club tenau lakah pawh an hriam hleithei rih lo tihna a ni.