A vawi thum nan Bagnaia a chak

Francesco Bagnaia chuan MotoGP tun season chhunga a vawi thum nan hnehna a chang. Pathianni zana tlan zawh tak Algarve Grand Prix-ah Bagnaia-a'n hnehna a chan avang hian Ducati chuan 2021 Constructors' title an la fel nghal bawk.

Tun hnaiah Bagnaia hian qualifier a tlan ṭha thei hle a, a zawna a vawi nga nan a hmasa ber (pole) aṭangin intlansiak bul a ṭan. A tir aṭanga a tawp thlengin inelna a thunun thei a, hnehna a chan avang hian championship lamah pawh pahnihna a ni tlang dawn tih a chiang nghal.

Ducati rider Bagnaia chuan, "Bike ṭha tak kan neih avangin thil a awlsam. Intlansiak a hautak zawh poh leh a tawpa hnehna changtu tan a hlu ṭhin, tun ṭumah pawh khan midang nen na taka kan inel avangin a nuam ka tih zawng tak a ni," tiin a sawi.

October thla khan Fabio Quartararo chuan F1 champion a nihna a nemnghet tawh. Yamaha rider hi tun ṭumah chuan a che fuh lo, lap nga tlan hmabak an la neih laiin a chesual a, tun season bika intlansiak a hmachhawn tluan theih loh vawi khatna a ni.

MotoGP hi season kal laiah intlansiak vawi 17 an nei tawh. November 14, Pathianni hian Valencian GP an tlan dawn a, kumin atana intlansiak hnuhnung ber a ni ang. Hripui leng vangin tun season-ah inelna paruk lai an ṭhulh.