Paris Masters champion Djokovic

Novak Djokovic chuan a vawi ruk nan Paris Masters title a la a, Grand Slam dawta inelna ngaihhlut Masters 1000 huanga champion hnem ber record a siam nghal - Rafael Nadal (36 titles) nen record inṭawm an neih chu a kal fal san.

Pathianni zan final inkhel hmuhnawm takah Djokovic hian champion lai Daniil Medvedev chu 4-6, 6-3, 6-3 in a hneh. Player pahnih hi US Open final-ah khan an intawng tawh bawk, an intawn hmasak a chak lo Novak zawkin hnehna a chang ve thung.

Novak a class
Set hmasa berah Medvedev-a'n a khingpui service vawi hnih a chhuhsak hmasa a, bul a ṭan ṭha hle. Set a lak bakah a khel ṭha zawk a ni a, a inkhelh thiamna hard court a nih bawk avangin champion nawn tura rinkai a ni.

Mahse, set hnihna aṭangin Djokovic-a'n a tawnhriat neih ṭhat a chhawr ṭan, inkhel ti muangin zawi muangin a pawt thla zel. Hun pawimawh lai taka a chet fuh zawk miau avangin a tawpah chuan Serbian star zawk a chungnung.

Masters 1000 inelna hi hmun kuaah a awm a, ngaihhlut an hlawh hlawm hle. Heng inelna pakuaah hian Djokovic chauh hi champion kim thei a ni, a record ang nei ve tur chuan player dang tan a harsa tawh khawp ang tih a rin theih.

Number 1
Champion ringawt a ni lo, world ranking lamah pawh a chungnung ber a ni zel. Paris Masters a khelh ṭhat avangin Djokovic hian world number 1 ni chungin kum tawp a hmang thei dawn a, hei pawh hi record thar a ni dawn.

Pete Sampras leh Djokovic ten vawi ruk zet chu number 1 ni chungin kum tawp an hmang tawh, record nei ṭha ber an ni. Kumin an hman liam meuh chuan chuh buaitu awm loin Novak hi record chelhtu a ni ang.

Medvedev chuan, "Hun a lo la kal zel ang a, tun dinhmuna Djokovic ngaina lo tute pawh hian a ropuizia hi an la hre chhuak ang," a ti a, a hneh loh Djokovic chu khawvela tennis player ropui berte zing mi a nih thu a sawi chhuak.