Genoa manager thar Shevchenko

Serie A club Genoa chuan Ukraine coach hlui Andriy Shevchenko chu manager atan an lalut a, kum 2024 thleng atan contract an ziahpui.

Kum 45 mi Shevchenko hian Inrinnia an ban tak Davide Ballardini a thlak ang. Genoa hi table-ah 17-naah an awm mek a, relegation zone-a awm Sampdoria nen point kua ve ve an hmu. Griffin (Genoa) hi tun season match 12 an khelh tawhah vawi khat chiah an la chak a, league match kuaah chak hmel an hmu tawh lo.

Shevchenko hian kum 2012 khan inkhelh a chawlhsan a, Ukraine tana goal khung tam ber niin match 111 aṭangin goal 48 a khung. Ukrainian striker hian an ram club Dynamo Kiev aṭanga bul ṭanin kum 1999 khan AC Milan a zawm a, Italian club hi Serie A leh Champions League nomawi a lakpui bakah kum 2004 khan Ballon d'Or a dawng.

Kum 2006 khan Chelsea-in pound maktaduai 30-in Shevchenko hi an lalut a, FA Cup leh League Cup-ah a champion pui. Ukranian striker hian a hun tawp hi a bul ṭanna Dynamo Kiev-ah a hmang.

International break vangin Shevchenko-a'n inpuahchahna hun ṭha a nei thei dawn. Genoa hian November 22, Pathianni zanah Jose Mourinho enkawl Roma an hmachhawn ang.