Conte-a Spurs an chak zo lo

Antonio Conte enkawlna hnuaiah Tottenham Hotspur boruak lian viau mah se Italian coach hnuaia an league match hmasa berah an chak zo lo a, khualmualah Everton nen 0-0 in an inhnehtawk.

Spurs-in goal khung lo mah se coach ban tak Nuno Espirito Santo hnuaia an khelh dan nena khaikhin chuan London club-in hma an sawn tih a lang a, Juventus coach hlui Conte-a'n a team kaihruai tura hun a ngah hunah chuan tun aiin an danglam zawk tawh ngei ang.

Manchester United laka 3-0 a an tlawm ṭuma target zawna shot nei lo Spurs hian Everton lakah pawh target-ah shot an nei chuang lo a, mahse, an goal nawr kawngah erawh hmasawnna hmuh tur a awm.

Giovani lo Celso chuan post a tih per a, Conte ruahmannaa wing-back pawimawh ṭhinna hmuh tur a awm bawk - Sergio Reguilon leh Emerson Royal ten goal khungna remchang an nei ve ve a, mahse, an chhawr thei lo.

Conte tana ngaihtuah tur erawh tlarhmaa Harry Kane, Son Heung-min leh Lucas Moura an ni. Player pathum hian Everton tlarhnung enchhin turin chance an nei tam tawk lo a, Italian coach-in a tlarhma pathum an hriam belh theih dan tur a ngaihtuah ang.

Kum 52 mi Conte-a'n Spurs-a danglamna thlen viau turin hun a la ngah tawk lo a, November 2 khan Spurs coach a ni dawn tih a chiang ve chauh - a match hmasa ber Europa Conference League-ah khelin Vitesse chu 3-2 in an hneh tawh tih hriat a ṭha.

Hetihrual hian Conte-a'n league-a a hmachhawn hmasak ber hi coach ṭha Rafael Benitez-a enkawl Everton an ni a, a awlsam bik lo.

Chutihrual chuan Spanish coach hnuaia hmasawn tak Everton hi tun hnaiah an tlahniam a, September hnu khan league-ah an chak leh tawh lo - player inhliam Dominic Calvert-Lewin leh midfielder Abdoulaye Doucoure awm loh an tuar.

Spurs lakah erawh Everton an insiamṭha tih a lang a, goal khungna chance pawh an nei. Forward Richarlison-a'n Spurs goalkeeper Hugo Lloris lakah penalty a hlawhah inngai mah se referee-in penalty spot a kawh zet hnuah a ennawn a, a thutlukna a sut.

Merseyside club tan Michael Keane leh Demarai Gray ten chance duhawm an hlah bawk a, hun pek belhah Mason Holgate chu hnawhchhuah a ni bawk. Spurs tan a tam zawk nih chhawr turin hun erawh a awm tawh lo.