Verstappen tan nomawi a hnai zel

Max Verstappen chuan Formula 1 champion nih ngei a tum ruh hle a, champion lai Lewis Hamilton hmaah a thleng leh ta. Mexico City Grand Prix-ah Max hian hnehna changin championship lama a hmahruaina a sawhnghet.

Verstappen hnungah hian a elpui ber Hamilton a thleng a, Mercedes driver hi inelna tawp lamah Red Bull driver pakhat zawk Sergio Perez-a'n nawr buai viau mah se pahnihna dinhmun chu a hum tlang thei.

Max a chak
Qualifying lama che ṭha Mercedes driver pahnih Hamilton leh Valtteri Bottas ten a hmasa ber leh a dawt aṭangin inelna an hmachhawn ṭan a, an hnungah Red Bull car khalhtu Verstappen a awm thung.

Dutch tlangval Max hi dan theih a ni lo, season kal laia vawi kua zet a chakna ni turin a hma a awm pahnih hi a tlan pel. Team champion ni lai Mercedes tan Red Bull driver umphak loh hi a lawmawm loh ang a, an driver pahnih tan a na zual ngei ang.

Verstappen-a'n championship table-ah point 19 zetin hma a hruai fal ta, season tawp hmain intlansiak hmabak pali chauh a awm tawh. Chutihrualin intlansiak pakhata hnehna changtuin point 25 zet an hmuh theih avangin thlamuang taka awm theih a la ni lo ang.

A la zo lo
Che ṭha viau mah se Verstappen chuan hmabak an la ngah thu a sawi. Max chuan, "Kawng zawh tur thui tak kan la nei, dinhmun ṭha deuh tawh angin lang mah ila rei lote chhungin a la danglam leh vek thei," tiin a ṭawng fimkhur hle.

Champion lai Hamilton pawhin beisei a la neih thu sawiin, "Red Bull car neih ṭhatzia lanna chu Sergio kha a ni, a hma zawka kan tlan ṭan chung pawhin min hnaihchilh thei reng. Mahse, keini chu Mercedes kan ni a, kan zam ve ngai lo. A tawp thlengin kan bei ang," a ti.

November 14 hian Autodromo Jose Carlos Pace-ah Brazilian GP an tlan leh dawn. Brazil-a inelna an neih hnuhnung ber 2019 khan Verstappen-a'n hnehna a chang a, a sang zual pathum zingah Mercedes an lang lo, inelna an neih leh tur hi a ngaihnawm dawn.