Arsenal an sang tual tual

Premier League season bul an ṭan fuh loh avangin sawiselna nasa tak an tawk a, tunah zet chuan Arsenal hi dah hniam theih an ni tawh bik lo - Mikel Arteta naute hian Watford 1-0 a hnehin point 20 an hlawh chhuak ta.

Pathianni zan inkhelah Arsenal tan rawlthar duhawm Emile Smith Rowe chuan goal awmchhun a khung, minute 56-naah box pawn aṭangin laklawh nei miah loin a hlap lut a, a team hi table-ah pangana a nihpui.

Laipui a puak
Emirates Stadium-ah Arteta nauten inkhel bul ṭan fuhin ball pawh an chang hnem. Pierre-Emerick Aubameyang-a ball dan pial chu Bukayo Saka-a'n khung mah se VAR hman a nih hnuah an pawm lo.

Watford defender Danny Rose-a'n ṭul lo taka Alexandre Lacazette a tih tluk avangin penalty a chawi a, captain Auba pet chu keeper Ben Foster chuan a lo dansak. English keeper Foster hian Gabriel-a ball tauh chu ṭha zetin a dansak bawk.

Goal kan hmuh mai loh hnuah defender Ben White chuan ṭha takin ball a khalh lut a, duhthusama ṭhain pe chhuak lo mah se tun hnaia khel ṭha tak Smith Rowe ke zawnah kher a tla, ani hian keeper dan phak loha kilah a khung.

Gabon international Auba vanduai a kaltluang. Saka tana a assist an pawm lo a, penalty a hlah bakah Martin Odegaard-a goal khung tur a lo thlawh zeuh avangin a offside a, an hnawlsak bawk - atan chuan ni ṭha lo a ni.

Arsenal an harh
Arteta-a'n season hmasa khan Arsenal hi pariatna a nih pui, tun season bul ṭan nan a zawnin match thum an tlawm tehreng a nih kha. 'Arteta Out' tih chu social media lama titi lian tak pakhat a ni leh hman, tunah erawh manager ban duha thawm nei an awm ta meuh lo.

Tun kar tawp vuakvetah khan Premier League club pathumin manager an ban, ban theih dinhmuna ding hman Arteta erawhin boruak ṭhat vanglai a hmang mek. Tun hnaiah a zawnin inelna hrang hrangah match 10 chhung tlawm an nei lo hial.

Kum 39 mi Arteta chuan, "Premier League-ah chuan thil hrang hrang a thleng tam thei hle, a bik takin clean sheet neih hi a awlsam lo. Tun hnaia kan khelh dan a lungawi thlak, a bik takin international break neih hma chiaha chak hi a pawimawh," a ti.

Ranieri a lawm lo
Watford manager Claudio Ranieri chuan goal an chhuah dawna Arsenal player-te chet dan a dem hle, ball pet chhuak loa an nawr luih avangin khungpuite zahna nei lo tiin a sawisel hmiah mai a ni.

Ranieri chuan, "Arsenal lamin goal an khung lai khan kan player pakhat chu khelmualah hliam vangin a tlu mek, khatiangah kha chuan ball kha an pet out turah ka ngai a, chu chu tih ṭhin dan pawh a ni. Mahse, Arsenal lam khan an ti lo," tiin a sawi.

Arteta erawhin ngaihdan dang a nei. Spanish manager chuan, "Team inngaitlawm leh ngilnei ber kan nih ka ring, mahse engkim hi tu tan pawh tih dik vek theih a nih lohna lai a awm," tiin a sawi a, an goal khung dan bikah tihsual an neih loh thu a sawi ve thung.

Saka - Eng nge a offside chhan?
Arsenal chuan Bukayo Saka hmangin Watford lakah goal an khung hmasa zawkah an inngai a, England international hian Emerick Aubameyang dan per chu chiang takin a khung. Kum 20 mi Saka hmaah hian Watford defender la awm mah se football dan aṭang chuan offside a ni. FIFA Laws of the Game-ah chuan player chu a khingpui player hnuhnung pahnihna aia a awm hma chuan offside a ni, tih a ni a. Goalkeeper tiha sawi hrang loin player tihin a inziak.

Saka hmaah hian Watford defender awm mah se keeper Ben Foster chu Arsenal winger hnungah a awm thung. Foster hi player hnuhnung pahnihna a ni a, Saka aia a awm hnun avangin Arsenal goal khung offside vangin pawm a ni lo.