Chanmari Zothan dinhmun a hriat dawn

Hero Futsal Club Cham-pionship-ah Mizoram aiawha tel Chanmari Zothan Futsal Club-in group stage an paltlang dawn em tih chu vawiin hian a hriat ang.

Indira Gandhi Stadium Complex, Delhi-ah Mizo club hian vawiin chhun dar 12:00-ah group hmahruaitu Mohammedan Sporting Club an hmachhawn dawn. Tlai dar 2:30-ah Super Strikers Futsal Club leh Baroda Football Club te an inkhel leh bawk ang.

Group khat aṭangin team khat chauhin semifinal an lut dawn a, point inang pahnih emaw a aia tam emaw an awm a nih chuan head to head hman tur a ni a, an point a inang a nih chuan head to head Goal Difference leh Goal For te en leh tur a ni ang. Chanmari Zothan tan semifinal lut turin chak ngei a ṭul a, inkhel dangah Karantaka champion Super Strikers-in Baroda an hneh ngei hmel bawk avangin team pathumin point ruk ṭheuh an hmu thei tihna a ni.

Chanmari Zothan hian an match hmasa berah Super Strikers 6-4 in an hneh lo a, Bengaluru club Super Strikers hian 4-3 in Mohammedan an hneh bik lo. Mizo club-in Kolkata club hi an hneh ve bawk chuan team pathumte hi an inhneh kual vek dawn tihna a ni a, an pathum intumna bik goal difference a pawimawh ang.