Villa-in manager Smith an ban

Aston Villa-in match nga chhung an chak loh hnuah an manager Dean Smith an ban. Villa hian Zirtawpni khan Southampton 1-0 in an hneh lo a, table-ah 17-naah awmin relegation zone aṭanga an himna chu point hnih chauh a ni.

Villa chief executive Christian Purslow chuan, "Tun season-ah kan beisei angin result, khelh dan leh league-a kan dinhmun a ṭha lo. Hemi avang hian thutlukna siam a ṭul a, danglamna thlen turin coach kan thlak dawn," tiin a sawi.

Kum 50 mi Smith hian October 2018 khan Villa hi a enkawl ṭan a, season khatnaah Championship aṭangin Premeir League a kaipui. Season khatnaah inhamtang hram mah se 2019-20 Carabao Cup final an lut. Season liam ta khan Villa hi 11-naah an awm a, an chet ṭhatna kawngah captain Jack Grealish a ṭangkai hle.

Manchester City-in pound maktaduai 100-in Grealish an la chhuak a, Villa-in sum ṭhahnem tak sengin midfielder Emiliano Buendía, winger Leon Bailey leh forward Danny Ings te an lalut. Amaherawhchu Grealish a hmun ruak an hnawh khat thei lo a, English manager Smith-a'n a hna a chan phah.

Smith hi tun season Premier League-a manager an ban pangana a ni a; Xisco Munoz (Watford), Steve Bruce (Newcastle), Nuno Espirito Santo (Tottenham) leh Daniel Farke (Norwich) ten an hna an chân tawh.

Aston Villa-in Smith-a thlakna tur hi an la puang lo chungin Denmark coach Kasper Hjulmand hming sawi rik a ni. Villa sporting director Johan Lange hi Danish a nih ve tho avangin Euro 2020-a Denmark semifinal thlenpuitu hian Villa a enkawl a nih pawhin a mak lo ang.