Season thara coach nei tur Raducanu

Emma Raducanu chuan coach nei lo chuan thui tak thlen a harsa tih a hria a, season thar tirah coach a neih tur thu a sawi. Australian Open chu team thar nen a hmachhawn dawn tihna a ni.

US Open champion a nih hnu lawkah Raducanu leh a coach in an thawhdunna an titawp, a hnu lamah coach nghet a la nei leh lo. Tun hnai khan Esteban Carril kaihhruaina hnuaiah training a nei a, Carril erawh a coach nghet a ni dawn lo.

British tleirawl Raducanu chuan, "Tuna ka awm danah hian lungawi lohna ka nei hran lo, min thlawp tlattu tam tak an awm avangin ka dinna ngaiah ka ding thei. Coach thar ka nei dawn a, ruahman dan chuan Australian Open hmain a ni ang," a ti.

Australian Open hi January thla chawhnu lama khelh tur a ni dawn a, season khat chhunga Grand Slam hmasa ber turah hian champion tumin Raducanu hi a inlan ang.