Atletico an chesual, pakhatna Sociedad

La Liga-ah champion lai Atletico Madrid-in injury time-a goal hnih an chhuah avangin Valencia nen 3-3 in an inhnehtawk a, point hnih hlu tak an hloh. Inkhel dangah Real Sociedad-in Osasuna 2-0 in an hneh a, point 28 hmuin league hmahruaitu an ni.

Champion rinkai zinga mi Real Madrid match khatin an khel tlem a, point 27 hmuin pahnihnaah an awm. Barcelona erawh Ronald Koeman hnuaiah result ṭha an nei lo a, point 17 chauh an hmuh avangin manager thar Xavi-a'n hna a ngah dawn hle.

A goal tlai
Mestalla Stadium-ah Atletico tan Luis Suarez-a'n minute 35-naah goal hmahruai a khung a, amaherawhchu minute 50-naah Goncalo Guedes shot-cross chu Atletico defender Stefan Savic-a'n an lamah a ti lut.

Altetico tan Antoine Griezmann-a'n a thiam thil a rawn pholang a, French forward hian minute 58-naah thui tak a khalh hnuin mawi zetin a pet goal. Minute hnih hnuah Suarez-a goal bawh nat zarah Sime Vrsaljko-a'n a su lut a, Atletico-in 3-1 in hma an hruai.

Diego Simeone hote chak chiangin lang mah se mualneitu Valencia an beidawng lo a, injury time minute hnihnaah Hugo Duro-a'n siphurh a sut ṭhen. Kum 21 mi Duro bawk hian injury time minute ruknaah siphurh sutna goal a tauh lut.

Hei le, Sociedad
Real Sociedad-in La Liga team ṭha zinga mi an ni tih pholangin khualmualah Osasuna 2-0 in an hneh. First half-a goal a luh loh hnuin Mikel Merino-a'n minute 72-naah a pet goal a, kum 25 mi Merino hian a naupan laia a club lakah hian goal khung a lawm duh lo.

Manchester United player hlui Adnan Januzaj-a'n minute 82-naah a penalty hlawhchhuah chu goal-ah a chantir a, tun season-a a goal hmasa ber niin Sociedad-in 2-0 in hnehna an chang.