New Zealand an tling, India an tla

India-in T20 World Cup semifinal lut turin Afghanistan puihna an beisei a, amaherawhchu Men in Blue duhthusam angin a kal ta lo. Virat Kohli hote tan Afghanistan leh team dang dem theih an ni lo a, an match hmasa pahniha Pakistan leh New Zealand an hneh loh chu an tlak chhan a ni.

Pathianni khan New Zealand hian Afghanistan an hmachhawn a, Black Caps tan semifinal lut turin chak a tawk. Kane Williamson hoin Black Caps-in wicket riatin Afghanistan an hneh. Inkhel dangah Pakistan-in group 2-a pakhatna dinhmun nemnghet turin Scotland chu 72 runs-in an hneh ve bawk.

November 10, Nilaini hian semifinal hmasa zawk khelh a ni dawn a, England leh New Zealand te an inkhel ang. Pakistan leh Australia ten November 11, Ninganiah final lut tur an zawng ve bawk ang. Nomawi inchuhna hi November 14, Pathianniah khelh tur a ni.

Beisei a tlem
India-in semifinal an luh theih nan Afghanistan chak turin an duh a, chutih-rualin Mohammad Nabi leh a hote hian semifinal luh beiseina an la neih avangin chak an mamawh hrim hrim bawk.

Sheikh Zayed Stadium-ah ṭhumvawra chak Afghanistan-in bat hmasak an thlang. India-in thilmak a thlen beisei mah se inkhelh ṭan aṭangin a thlen a rinawm loh nghal a, Afghanistan top order Hazratullah Zazai (2), Mohammad Shahzad (4), Rahmanullah Gurbaz (6) leh Gulbadin Naib (15) te chu run tam an siam hmain pavillion lamah Black Caps bowler ten an thawnlet.

Afghanistan tan Najibullah Zadran a rawn che ṭha a, ball 48-ah 73 runs siamin over 20-ah 124/8 runs an tlin thei hram. Zadran hi che ṭha viau mah se thlawptu dang an nei lo a, India tan beisei a tlem a, New Zealand-in semifinal an hnaih.

Williamson nge nge
New Zealand opener Martin Guptill (28) leh Daryl Mitchell (17) te inkawpin over thum lekah 26 runs an siam hman a, run rate pawh a ṭha hle. Mitchell chhuah hnua rawn lut Williamson erawhin sawp an mamawh lo a, chak chiah an mamawh tih a hria.

Black Caps captain Williamson (40*) hian cool takin a bat a, Devon Conway (36) nena inthlawp tawnin over 18.1-ah 125/2 runs siamin hnehna an chang. Khawvel batsman ṭha ber zinga mi Williamson hian batting chauh ni loin cricket game a hriat chianzia a pholang.

Eng nge an sawi?
New Zealand captain Kane William-son chuan, "Kan khingpuite khan team chakpui thei player an kawl tih kan hria a, kan fimkhur a ṭul. Kan mamawh ang chiahin kan khel ṭha a, kan khelh danah kan lawm hle," tiin a sawi.

Afghanistan captain Mohammad Nabi chuan, "Target pangngai tak siam kan tum a, bul kan ṭan ṭhat loh bakah a tawp kan khar ṭha lo. Kan run siam tum zat kha 30 runs velin kan pha lo a, beisei angin kan khel chhuak lo. Chutihrualin tun inelna kan hmachhawn danah lawmna tur tam tak a awmin kan hria," tiin a sawi ve bawk.