A hun têa rah ṭhîn Cristiano Ronaldo chu kum 36 mi a nih hnuah pawh a vanglai ang thoin a la vul a, chak duhna rilru pu ringawt loin team chakpui turin a theihna sang tak a pholang.

Manchester United chuan Nilaini zan khan Old Trafford-ah Atalanta 3-2 in an lehthal a, Ronaldo hian minute 81-naah chakna goal a tauh lut.

Ole Gunnar Solskjaer-a hoten Italian club an hneh avangin Champions League group F-ah point ruk hmuin hmahruaitu an ni a, an hnuaiah Atalanta (4), Villarreal (4) leh Young Boys te an awm. Europa League champion Yellow Submarine hian Bern-ah mualneitu Young Boys 4-1 in an sawp.

Thutlukna huaisen
Man United-in tun hnaiah result ṭha an nei lo a, Solskjaer-a'n thutlukna huaisen siamin Paul Pogba chu bench-ah a dah a - Jadon Sancho, Edinson Cavani, Donny van de Beek leh Jesse Lingard te nen bench-ah an ṭhu ho.

Raphael Varane khelh theih loh vangin tlarhnungah captain Harry Maguire leh Victor Lindelof-te an inkawp a, midfield-ah season liam ta angin Scott McTominay leh Fred te an inkawp bawk.

Leicester City laka goal khungtu Marcus Rashford-a'n bul a ṭan a, tlarhmaah Bruno Fernandes, Mason Greenwood leh Ronaldo te an awm. Man United an kim thawkhat a, Atalanta erawh hiam vangin an buai hle.

Italian club hian an player pawimawh pali - defender Berat Djimsiti leh Rafael Toloi, wing back Robin Gosens leh midfielder Matteo Pessina-te an chhawr thei lo thung.

Atalanta hun
Inkhel an ṭan a, Man United forward Rashford-a'n chance ṭha a hlah a, goal ta reng pawh ni se English forward hi a offside ang. Atalanta erawhin an hun ṭha neih goal-ah an chantir nghal thung.

Minute 15-naah Davide Zappacosta cross chu Mario Pasalic-a'n a tlawh lut a, Italian club hian Man United tlarhnung an ṭhiat chiang hle. Mualneitu lamin Fred hmangin chance nei mah se keeper Juan Musso-a'n ṭha zetin a dang.

Goal hmaah Atalanta an hriam zawk a, minute 28-naah Teun Koopmeiners-a corner pet chu Merih Demiral-a'n a tauh lut ṭha a, Luke Shaw-a'n Turkish defender hi a veng hneh lo.

Man United-in first half-ah goal an khung lo a, Fred-a'n chance ṭha dang a hlah bakah Rashford-a'n keeper chiah a hmachhawn hnuah crossbar a pet per.

Man United hun
Second half ṭan phatah Man United an hmuhnawm nghal a, Ronaldo goal khung tur chu keeper Musso-a'n a dansak. Bruno Fernandes-a'n tlarhma player tan ball ṭha a pe hnem a; Atalanta tihsual hnua minute 53-naah Portuguese midfielder pass chu Rashford-a'n cool zetin goal kilah a khung.

Man United goal bawh a na zui a, McTominay-a'n goal ban a tihper. Chutihrualin Man United keeper David de Gea pawhin a zawn zatin hna a nei a, Luis Muriel leh Ruslan Malinovskyi-te ball pet chu ṭha takin a dang ve ve.

Leicester City an hneh loh ṭuma tlarhnung lama mualpho Harry Maguire-a'n a pet goal a, minute 75-naa lut goal hi defender goal mah ni se forward ṭha bik tih atana mawi a ni a, 2-2 a ni chiah.

Ronaldo hun
Man United-in chak beiseina an nei thar a, tlarhmaah Ronaldo an kawl bawk. Minute 81-naah vei lam aṭanga Shaw-a cross chu Ronaldo-a'n ṭha zetin a tauh goal.

Portugal captain hian UCL match thumah goal a khung vek a, Villarreal an hneh ṭumin injury time-ah chakna goal a khung tawh bawk.

Kum 36 mi forward hian goal a khung hnuah tlarhnung lamah goal venhim hna a thawk zui a, mimal hmingṭhatna bakah team chakpui a duh tih a pholang.

Hmabak Liverpool
Solskjaer-a hoten Champions League-ah an dinhmun an siam ṭha a, group hmahruaitu an ni. Norwegian manager chunga pressure nasa tak chu ziaawm sawt mah se kartawpah Liverpool an hmachhawn dawn avangin Man United hmabak a la hautak hle.

Premier League-ah Man United hian point 14 hmuin paruknaah an awm mek a, an khingpui tur Jurgen Klopp-a hote hi point 18 hmuin pahnihnaah an awm.

Tun hnaiah Reds leh Mohamed Salah an che ṭha a, Atletico hneh zo hlim Liverpool laka Man United khelh dan hian Solskjaer-a hmalam hun a hril theih dan a awm ang.

Player ṭha ṭhenkhat an khel thei lo a, a khelte erawh an khel ṭha. Man United an ṭha a, inzirna tur kan neih belh. Chutihrualin inzirna tur neih leh ṭhin erawh a pawi ka ti. - Gian Piero Gasperini, Atalanta coach

Ronaldo-a'n goal a khung lai khan a hnung aṭangin ka lo thlir reng a, a zuan dan leh a zuan hunte kha a dik vek a ni. - Harry Maguire, Man United captain

Ronaldo hi an sawisel duh a nih chuan a khel en rawh se. A thawhrimna leh a tlan tamziate an hmu thei ang. - Ole Gunnar Solskjaer, Man United manager