Barcelona-ah Ansu Fati a rinawm

Lionel Messi kalsan tak number 10 jersey hatu Ansu Fati-a'n amah ringtute chungah a rinna a nghat ngam a, Barcelona-ah kum ruk dang cham chhunzawm turin contract thar a ziak.

Fati-a contract thar hi June 30, 2027 thleng tur a ni a, a contract-ah hian lei chhuak duh an awm chuan euro tluklehdingawn khata an lei a ngaih tur thu an ziak tel!

Kum 18 mi Fati hian kum 10 mi lek a nihin Barcelona hi a zawm tawh a, season hmasa a hliam avangin thla 10 zet chawl mah se a lo kir lehna match hmasa berah goal a khung lehnghal.

Spain tan vawi li inlana goal khat khungtu forward hian a career-ah Barcelona tan inelna hrang hrangah match 48 a khel a, goal 15 a khungsak der tawh.

August 25, 2019 khan Real Betis lakah bench aṭanga luhtir a ni a, reserve team tan pawha a khelh hma hauhin senior team tan a inlan - kum 16 leh ni 298 mi niin Barca tana inlan thei naupang ber dawttu a ni.

Kum 2019-ah vek hian August 31-a Osasuna nen 2-2 a an inhnehtawk ṭumin goal a khung a, kum 16 leh ni 304 mi niin Catalan club tana goal khung thei naupang ber record a siam.

Fati hma hian Barce-lona chuan an rawlthar duhawm Pedri an lo chelh tawh a, June 30, 2026 thleng cham tura contract ziaktu midfielder pawh hi a lei duhtu an awm chuan euro tluklehdingawn khat an sen a ngai dawn a ni!