Daka goal 4 hmangin Leicester tho chhuak

Chak lo tura ngaih an nih hnuah Leicester City chuan Spartak Moscow 4-3 in an lehthal a, an thawh chhuah theihna chhan hi Patson Daka an neih vang a ni. Daka hian hattrick siam nan minute kua chiah hun a hmang, chumi hnuah an goal lina a khung bawk!

Nilaini zan Europa League inkhelah Zambia international chu a langsar ber a ni a, an match hnuhnung zawka Manchester United an hneh ṭum pawhin bench aṭanga lutin goal a khung tawh; a hming kan lam chhunzawm zel a nih pawhin a mak lo ang.

Foxes an buai hmasa
Leicester City hian Europa League match an khelh hmasak pahnihah hneh an nei lo, vawi khat tlawmin ṭum khat an inhnehtawk. Russia khawpuia inkhelah pawh goal hnih an phur hmasa, chiang taka tlawm tur niin an lang hman.

Minute 11-naah Alexander Sobolev hmangin goal an khung ṭan a, chawlhlawk hmain Chelsea wing back hlui Victor Moses thawhrah sengtu Jordan Larsson chuan an goal hnihna a khung leh bawk - khualmualah Brendan Rodgers-a naute an hawi hil hle.

Mahse, an phurrit lutuk tur hliah khuh nan Daka chuan chawlhlawk hmain goal khat a khung. Spartak lamin offside trap am siam sual karah tal putin, goalkeeper Aleksandr Maksimenko dan theih loh goal a khung.

An tho leh ta
Chak lo ni se Leicester tan knockout stage luh a harsa tawh dawn, manager Rodgers-a'n chawlhlawk laiin a naute a fuih ṭha tih a lang. Second half minute thumnaah Daka-a'n si phurh sut zoin, a hnuah goal hnih dangin an chak a nemnghet bawk.

Mualneitu lamin hun tawp dawnah Sobolev hmangin goal khat an neih belh ve leh a, a siamsaktu chu Moses bawk a ni. Mahse, goal dang neih belh turin hunin a daih tawh lo, dinhmun duhawm taka an din tawh hnuah Spartak an mualpho.

Hnehna changtu Foxes hian match thum aṭanga point li hmuin group C-ah pahnihna an ni, an hneh tak Spartak chungah an awm. Russian club hian point thum an nei tawh thung a, khelh hmabak match thum an la neih avangin an dinhmun a la inthlak dawrh thei.

Tu nge Daka?
Nipui bazar lai khan Red Bull Salzburg aṭangin Leicester City hian pound maktaduai 22 sengin Patson Daka hi an lei. Rodgers-a'n tlarhmaa khel turin Jamie Vardy leh Kelechi Iheanacho te a nei a, player thar tan hmun nghet chan nghal a harsa.

Season hmasa Austrian Bundesliga lama goal 27 khungtu Daka hian hun remchang a hmuh erawh a bawhpelh lo. Kar hmasaa 4-2 a Manchester United an hneh ṭumin bench aṭanga lutin goal a khung a, tun ṭumah chuan Vardy aiah bul ṭantu niin goal li a khung - manager tan en kân reng a harsa tawh ang.

Spartak laka a goal pali kha a ṭha hlawm hle a, a khungna kha Russian club ṭha an nih bawk avangin sawi nep theih a ni lo. Nikum khan Salzburg tana a khelh laiin Austrian Cup-ah SW Bregenz an hmachhawn ṭumin goal li a lo khung tawh bawk, goal khung thei bikte zinga mi a ni.

Beiseina nung
Leicester manager Brendan Rodgers chuan, "Group match hmasa lama kan chet ṭhat loh avangin sawisel kan hlawh a ni mai thei, tunah chuan harsa takin hnehna kan chang ta. Kan khelh hmabak pahnih hi King Power Stadium-ah a ni dawn, a chung bera awm theih kan la beisei hle.

"Spartak khan bul an ṭan fuhin kan buai tih kha zep tur a awm lo. Amaherawhchu second half-ah kan goal nawr a na em em a, kan theihna tak kan lanchhuah tir niah ka ngai, a pawimawh ber chu hnehna chan hi a ni," tiin a sawi.

Foxes hian tun kar tawpah Premier League khel turin Brentford an lenchilh zui dawn a, inkhel hautak an hmachhawn leh nghal dawn. Bees (Brentford kohna) lakah chuan Vardy a inlan a rinawm a, ani thlawp tur hian Daka nge Iheanacho lut zawk ang, tih hriat a châkawm tawh hle.