Djokovic tan vaccine lak ngei a ngai

Australia immigration minister Alex Hawke chuan an rama lut tur tan chuan hripui laka invenna (vaccine) la kim tawh chauh visa an pek tur thu a sawi chiang, hei hian infiamna a nghawng na dawn hle.

January thla hian Australian Open 2021 khelh a ni dawn, ram dang aṭanga player inlan tur tan chuan vaccine lak kim ngei ngei a ngai tihna a ni. Hmanni khan sorkar chuan inkaihhruaina hi a ti chhuak tawh.

Australian Open champion lai Novak Djkovic hi vaccine la duh lo zinga mi a ni. Australia sorkar thu chhuah a hriat hnu pawhin invenna hi a la ngei dawn em tih a chiang lo tih a sawi a, tunah chuan Minister-in thu a nei nawn leh a, an kalphung a danglam a rinawm ta lo.

Hawke-a chuan, "Australia a rawn kal tur chuan vaccine in lak kim a ngai. Hei hi tennis player tan chauh a ni lo, midang zawng zawng tan pawh a ni, sorkar in kan ṭhatna tura a dan siam zawm lo tan kawng dang a awm lo ang.

"Tun hnaiah Novak chungchang sawi a awm, hei hi amah ka hrilhna bik a ni lo, mi zawng zawng tana sawi ka ni. Ani pawh a rawn zin duh a nih chuan vaccine a lak kim a ngai," tiin a sawi hmiah mai a ni.

Tennis mipa player zingah 65% chuan vaccine hi an la tawh, hmeichhe zingah 60% velin an la tawh bawk. Grand Slam hmasa ber an khel ve duh a nih chuan invenna an lak ve mai a ngai dawn.

Australia health minister Greg Hunt pawhin mipui tana ṭha tur a nih thu a lo sawi ve bawk a, tun hnaiah ram chhung mite chu an inzin pawh thei leh ṭan dawn a, nakkum tir lamah ram pawn mi tan zin leh theih a ni ṭan ang.

Serbian star Djokovic hian Grand Slam title 20 a la tawh, major title a lak zinga pakua chu Australian Open nomawi a ni. Hlawhtling taka a khelh tawhah Melburne Park a pan thei dawn em, tih chu kan hre thuai dawn.