Sangtea zirtirtu boxing legend El Chacal

WBC youth champion Lalrinsanga Tlau chuan October 23, Inrinni zan dar 10:35 hian Dubai-ah Georgian boxer Ilia Beruashvili a hmachhawn dawn.

Sangtea hian October 9, Inrinni khan Dubai a thleng a, Cuban boxer lar Guillermo Rigondeaux te nen training an nei ho. Khawhruhlian tlangval chuan, "Rigondeaux bula training chu a hlawk thlak takzet. A kum a upa tawh chungin a la chak ṭha a, thil thar tam tak ka zir belh a ni," tiin Vanglaini a hrilh.

Cuban boxer Guillermo Rigondeaux hi kum 41 mi a ni tawh a, khawvel boxer zinga sulhnu nei ṭha ber zinga mi a ni. Rigondeaux hi El Chacal (The Jackal) hminglem pek a ni a, Olympic-ah gold medal vawi hnih a lak tawh bakah World Championships (gold pahnih), World Cup (gold pathum), Pan American Games (gold pakhat) leh Central American and Caribbean Games (gold pakhat) ah te a champion tawh.

Sangtea hi Grassroot Boxing Promotions and Management hnuaiah a awm mek a, Grassroot Boxing dintu Mujtaba Kamal leh El Chacal te hi kum 2003 khan Cuba-ah an lo training ho tawh bawk a ni.

Mizo boxer hian WBC youth title a lak hnuah Ilia Beruashvili hi a hmachhawn dawn a, professional career-a dinhmun ṭha zawk a din theih nan hnehna chan ngei a mamawh. Mizo tlangval leh Georgian tlangval inhnek hi Zonet kaltlangin a en theih ang.

Sangtea te inhnek bakah boxing hmuhnawm dang thlir tur a awm dawn. Box Rec-a India number 1 Faizar Anwar chuan Romanian boxer Octavian Gratii a hmachhawn ang a, main event erawh WBO Cruiserweight African Championship a ni ang.

WBO title inchuhnaah hian Rolly Lambert Fogoum (Cameroon) leh John Napari (Ghana) te an inhnek dawn a, heng bout-te hi Zonet kaltlangin a en theih vek dawn a ni.