Benfica lakah Bayern an hrang

Tun season Champions League-ah Benfica hi tlarhnung phui berte zinga mi an ni, an match hmasa pahnihah goal an chhuah miah lo. Mahse, mikhual huangtau Bayern Munich an hmachhawn meuh chuan an ṭang thei lo, anmahni mualah 4-0 in an tlawm.

German champion hian a tir lamah chuan goal khung an harsat ve tho. Amaherawhchu hun tawp hma minute 20 chauh awm tawhah goal li an khung, forward Leroy Sane-a'n goal hnih a khung bakah Robert Lewandowski chuan a khung; Everton-a'n anmahni lamah a ti lut bawk.

Portuguese club hi chiang takin an chak lo, chutih rualin an khel chhe lo. A tir lamah Bayern keeper Manuel Neuer a khel ṭha hlauh, ani hian Darwin Nunez khung tur ṭha zetin a dansak bakah Roman Yaremchuk-a'n goal pawnah chiah a pet chhuak bawk a ni.

Manager Julian Nagelsmann-a'n damlohna avangin a naute a ho thei lo a, assistant coach Dino Toppmoller kaihhruainaa khel an ni. Manager awm lo mah se an khelh dan phung nghet tak erawh an chhawm nung thei.

Khualmuala Champions League an khelh hnuhnung 20 zetah Bayern hian chak loh an nei lo, hei hi record a ni. Season kal laiah pawh hian an chesual viau a nih ngawt loh chuan champion tura rinkai an ni phak.

Goal hnih khungtu Sane chuan, "A tirah pawh kan khel ṭha reng, mahse goal hmaah kan vanduai mai zawk a ni. Benfica ṭhatna kan hria a, chuvangin dawhthei takin hun ṭha kan hmuh hun kan nghak," a ti a, a tir lamah woodwork an tih per bakah an goal hmasa pahnih an pawm lo.

Bayern Munich hian match thum an khelhah hnehna an chang vek a, point kua hmuin group E hmahruaitu an ni. Goal 12 zet khung tawhin anmahni lamah a la lut ve miah lo a, harsa vak loin group hmahraitu an nih tlang a rinawm.