Chelsea chak mah se lawm a kim lo

Nilaini zan Champions League inkhelah Chelsea chuan harsatna nei loin an mikhual Malmo chu 4-0 in an sawp a, an match hnuhnung berah Juventus ngam lo mah se last 16 lut turin an dinhmun a ṭha leh ta rih hle.

London club tan Jorginho chuan penalty aṭangin goal hnih a khung a, Andreas Christensen leh Kai Havertz ten goal khat ve ve an khung bawk.

Chelsea-in an beisei ang ngeiin point thum an hlawh chhuak a, an lawm erawh a kim lo - striker Romelu Lukaku leh Timo Werner te chu hliam vangin lakchhuah an ngai a, lawma zuanpui tur chi a ni lo.

Group H inkhel dangah Juventus chuan 1-0 in Zenit St Petersburg an hneh bawk a, Italian club tan hian Dejan Kulusevski chuan hun tawp nan minute li chiah a awm tawh tihah chakna goal a khung.

Goal & hliam
Stamford Bridge-ah Chelsea chu chak tur chianga ngaih an ni a, inkhel ṭan aṭanga minute kuana lekah goal hmangin fan-te beiseina an rawn nemnghet.

Brazilian centre back Thiago Silva siamsak chu tlarhnung laia a dinpui Andreas Christensen chuan goal-ah a chantir a, Blues tan match 137 a khelha goal a khung hmasak ber a ni.

Minute 21-na lekah Chelsea-in lawmna leh lawm lohna tur an nei zui - Malmo centre back Lasse Nielsen chuan Lukaku a ti tlu a, Chelsea tana a match hmasa palia goal li a khung hnua match sarih chhung goal khung tawh lo striker hian a inrintawkna nei let turin penalty a hlawh chhuak a, a pawi lai erawh a inhliam tel.

Penalty pet thiam bik Jorginho chuan an hun ṭha hi harsatna nei loin goal-ah a chantir a, Blues an hlim rei lo. Lukaku-a'n khelh lui tum mah se a tlin lo a, minute 23-naah lakchhuah a ni.

Chelsea an chungnung
Blues-in minute 44-naah chanchin lawmawm lo dang an nei a, Lukaku inhliam hnuah Werner a inhliam ve leh - German forward thlak turin Callum Hudson-Odoi a lut.

Second half minute thumna lekah Chelsea-in Lukaku leh Werner tel lo pawhin goal an khung thei tih an pholang zui a, Werner thlaktu Odoi chuan Lukaku thlaktu Havertz tan a siamsak a, German forward-in a hlah lo.

Chelsea-in goal thum an khung a, an la duhtawk lo cheu - Eric Larsson chuan Antonio Rudiger lakah penalty a chawi a, Ballon d'Or dawng thei zinga hming ri ring tak Jorginho chuan a goal hnihna ni turin a khung.

Jorginho penalty hmasa zawk chu Johan Dahlin vena lut a ni a, Dahlin thlaktu Ismael Diawara-a'n Italy international hmachhawn ve lehin a dang bik lo - kum 1999 hnuah Jorginho hi Champions League match khata keeper hrang pahnih laka penalty pet goal thei hmasa ber a ni.

Lawmna karah lungngaihna
Chelsea-in Juve an ngam loh hnuah league match an khel zui a, Southampton 3-1 a an hneh hnuin Brentford (1-0) an hneh leh diam tawh a, Malmo an sawp leh tak avangin an phur sawt ang.

Mahse, Chelsea-in hliam vangin forward ṭha pahnih an chan a, Inrinni zanah league match an khelh zui dawn avangin player pahnih chân chunga point thum hlawhchhuah hian an lawm a tikim lo ang.

Chelsea boss Tuchel chuan, "Dam tur chuan player pahnihin hun an duh deuh dawn a, a hun tak sawi chiang tur chuan enfiah leh phawt an ngai - match ṭhenkhat chu an khel thei dawn lo," a ti a, Blues fans tan a ri a mawi lo.

Blues vanneihna erawh an hmabak match liah Norwich City (Premier League), Southampton (League Cup), Newcastle United (PL) leh Malmo (Champions League) an tum dawn a, an squad chhah dan enin Lukaku leh Werner tel lo pawhin November thleng chu talbuai lo tura ngaih an ni.

Juve an chak
Serie A lama an bul ṭan dan duhawm lo thup turin Champions League lamah Juventus an chak zel a, match thum aṭanga point kua an neih tak avangin round of 16 lo chu an mitthla meuh tawh lo ang.

Zenit mualah Juve hi 1-0 in an chak a, inkhel hmuhnawm erawh a ni lo - a chak zawk Juve tan pawh inchhuanna tur a tlem a, goal hi minute 86-naa Kulusevski tauh luh a ni a, Mattia de Sciglio siamsak a ni.

Massimiliano Allegri enkawl Juve hian target-ah vawi hnih chiah shot an nei a, bench aṭanga luhtir Kulusevski-a'n a khung bik laiin Weston McKennie khung tur erawh dansak a ni.

Juve keeper Wojciech Szczesny pawhin Claudinho leh Dmitriy Chistyakov shot tih loh chu hna a nei bik lo - Juve hi Champions League group stage match, khualmuala khelhah a zawnin vawi sarih an chak ta a, a zawna vawi ruk lo chak tawh Chelsea (2000-2004) leh Manchester United (2009-2010) record an khum.

Point thum hmuh kan duh a, hmu satliah loa phu tak chunga hlawh chhuak nih kan duh - kan duh pahnih hi kan hmu ve ve a ni. - Thomas Tuchel, Chelsea manager