India an che ṭha zel

T20 World Cup atana inpuahchahna inkhelah India chuan Nilaini zan khan Australia chu wicket riatin an hneh a, Virat Kohli hote hian England an hneh tawh bawk. Men in Blue hian October 24, Pathianni zan hian World Cup-a an match hmasa berah Pakistan an hmachhawn dawn.

ICC Academy Ground, Dubai-ah Australia-in bat hmasak an thlang a, Aussies tana bul ṭantu David Warner (1), Aaron Finch (8) leh Mitchell Marsh (0) te che ṭha lo mah se middle order lam an che ṭha. Steve Smith (57), Glenn Maxwell (37) leh Marcus Stoinis (41*) te zarah Aussies hian 152/5 runs an siam.

India batsman te an chet ṭhat avangin target pangngai tak hi awlsam takin an khum. KL Rahul (39), Rohit Sharma (60), Suryakumar (38*) leh Hardik Pandya (14) te hmangin over 17.5 lekah 153/2 runs siamin hnehna an chang. Aussies laka captain Rohit Sharma chu 60 runs a siam tihin pavilion-ah koh let a ni a, warm up match a nih angin Hardik Pandya khelhna hun an pe.

Cricket-ah hian damloh/inhliam vangin umpire hriatpuinain an chawl thei a, ngai a awh leh hman a nih chuan a kir leh thei. Chutihrualin a bat leh tawh lo a nih chuan 'retired not out' tiin an ziak lut ṭhin. Rohit Sharma erawh hi chu mahni duh thua pavillion a let a nih avangin bat pawh duh se, a lut thei tawh lo thung a, 'retired out' tia chhinchhiah an ni.