T20 Cricket World Cup ; Super 12 khel turin Sri Lanka an tling

T20 Cricket World Cup first round-ah Sri Lanka chuan match hnihah hnehna chang ve vein Super 12 khel turin an tling. Lions hi group 1-ah Australia, England, South Africa leh West Indies te nen an awm ho dawn a; Scotland, Oman leh Bangladesh te zinga pakhatin an belh leh ang.

Nilaini zanah Sri Lanka leh Ireland an inkhel a, Lions hian bat hmasak an thlang. Sheikh Zayed Stadium-ah Wanindu Hasaranga-a'n 71 runs a siam bakah Pathum Nissanka-a'n 61 runs a siam a, over 20-ah 171/7 runs an siam.

Ireland bat hun a thleng a, Andrew Balbirnie (41) leh Curtis Campher (24) te che chhe lo mah se Sri Lanka bowler an chungnung ta zawk. Maheesh Theekshana (17/3), Lahiru Kumara (22/2) leh Chamika Karunaratne (27/2) te an chet ṭhat avangin Ireland hi over 18.3-ah an thi vek a, 101 chauh an siam avangin Sri Lanka hi 70 runs in an chak.

Inkhel dangah Namibia (164/4)-in Netherlands (166/4) chu wicket rukin an hneh a, Super 12 lut turin beiseina an nei zel. Netherlands erawh an chak zawh loh avangin beisei tur an nei tawh lo. Vawiin hian group A team palite hian match hnuhnung ber an khel dawn a, Sri Lanka hnung zui tur a chiang dawn. Tlai dar 3:30-ah Netherlands hnehtu pahnih Namibia leh Ireland te an inkhel ang a, heta chak zawk hian Super 12 an lut ang.

Zanin dar 7:30 hian Sri Lanka leh Netherlands an inkhel dawn a, he inkhel erawhin awmzia a nei tawh lo. Chutihrualin Lions hi 2014 khan T20 World Cup-ah an champion tih hriat a ṭha a, nomawi chawi an tum a nih chuan batting lamah hma an sawn a ṭul.

Ireland an hneh ṭumah pawh hian top order lama awm Kusal Perera (0), Dinesh Chandimal (6) leh Avishka Fernando (0) ten 10 runs an siam tling lo a, Netherlands nena an inkhel tur hi Sri Lanka batsman tan chuan Super 12 atana inbuatsaihna ṭha tak a ni thei ang.