Kiev hnehtu Barca-in beiseina thar an nei

Champions League group stage-a an match hmasa pahniha an tlawm hnuin Barcelona an chak ve ta a, an mikhual Dynamo Kiev chu 1-0 a hnehin last 16 luh beiseina an nei ve leh ta.

Barcelona tan Gerard Pique chuan Jordi Alba cross aṭanga a ball hmuh chu tun season-a a goal hmasa ber ni turin volley hmangin mawi zetin a khung a, Ukrainian club-in a chhanletna tur an nei lo.

Khelmual chhung leh pawna talbuai mek Barca hian an match hmasa pahnihah 3-0 ve vein Bayern Munich leh Benfica an ngam lo a, hetih chhung zawng hian goal zawnah vawi khat chiah shot an nei.

March 1988 (UEFA Cup) hnuah Barca hian European football game-ah match thum a zawna goal khung loh an nei ngai lo a, Bayern leh Benfica laka an khelh dan en chuan an record duhawm lo hi an nihrual mai rinna a lian.

Mahse, sum harsatna aṭanga Barca an talchhuah theih nana a hlawh tihniamtu Pique-a'n a club mualpho tur ngaingam loin goal a khung a, a team a chhanhim.

Catalan club tan hian Sergino Dest leh Ansu Fati te chuan goal khungna remchang an nei ve ve bawk a, mahse, player beiseiawm pahnih hian goal an khung thei lo - goal khatah lungawi an zir.

Barcelona tana Cham-pions League-a a inlan vawi khatna ni turin Sergio Aguero chu bench aṭanga luhtir a ni bawk a, mahse, Argentine forward hian chance duh-awm tia sawi tur erawh a nei hman lo.

Catalan club-in hnehna an chan avangin group E-ah point thum hmuin pathumna an ni a, 4-0 a Benfica sawptu Bayern Munich chuan point kua nei chungin hma an hruai.

Pahnihna Benfica-in point li bak an la hmuh loh avangin Barca nen an inkarah point khat chiah a awm a, Ronald Koeman-a team tan a thiam 16 zinga tel turin chance a la sang hle.

Hei mai a ni lo - chak result hi Barcelona tan chuan intihphurna ṭha tak a ni. Pathianni zanah Catalan club hian El Clasico khel turin an hmelma kumhlun Real Madrid an mikhual dawn a, Barca-in table-a pahnihna Real hi point hnih chiaha an phak loh avangin hnehna an chan chuan La Liga nomawi beiseina a nung thar leh ang.