Lacazette a pawimawh - Arteta

Arsenal manager Mikel Arteta chuan vawi khatah player zawng zawng chhawr rual theih a nih loh thu a sawi a, striker Alexandre Lacazette pawhin hmun pawimawh tak a la chan reng thu a sawi.

Tun season-ah Lacazette hian khelhna hmun a chang mumal lo. Premier League match an khelh hnuhnung bera Crystal Palace nen an inhnehtawk ṭum erawhin hun tawp dawnah goal pawimawh a khung.

Arteta chuan, "Palace lakah chauh a ni lo, Brighton kan hmachhawn ṭum pawhin Laca hi a khel ṭha hle. Arsenal ka enkawl tirh aṭang khan chhut ila, match a khel hnemin hmun pawimawh a chang, tunah pawh inzawh buai ngai loin kan player pawimawh a ni," tiin Lacazette chungchang a sawi.

Arsenal hian zanin dar 12:30 hian Emirates Stadium-ah Aston Villa an mikhual dawn. An goalkeeper hlui, inkhelh tam duh vanga chhuak Emiliano Martinez chu Villa tana si ban nghaktu a ni ang.

Martinez chungchang sawiin Arteta chuan, "Emi hi ka enkawl hman, a football zinkawnga hun pawimawh tak a tawn lai khan a kiangah ka awm. Inkhelh a duh a, chuvangin atana ṭha tur kan ngaihtuah, tuna a khel ṭha hi ka lawmpui," tiin a sawi.

Gunners hian October thla chhungin EPL match hnih an khel tawh a, an inhnehtawk ve ve; point 11 neiin 12-na dinhmun an luah mek - an mikhual tur Villa hian point 10 neiin an hnuai chiahah an awm thung.