UEFA Nations League season thar chu zanin aṭangin khelh ṭan a ni dawn a, inelna hi friendly match u awrh ni mah se a bul ṭanna tur Germany leh Spain erawh en a châkawm hle.

Europe ram lian pahnih hi zanin dar 12:15 hian Mercedes-Benz Arena, Stuttgart-ah an inkhel dawn. Germany-in Champions League nomawi chawitu Bayern Munich player ṭhenkhat an awltir a, chutihrualin Joachim Low-a'n Thomas Muller leh Jerome Boateng te a mamawh loh thu a la sawi fan avangin 2014 World Cup champion khelh dan hian zirchian a hlawh ang.

Champions League final thlirtute chuan Manuel Neuer-a'n thlak a la mamawh lo tih an hria ang. Chutihrualin tun ṭumah hian Neuer hi hahdam tir a ni a, a elpui ber Barcelona keeper Marc-André ter Stegen a awl bawk.

Spain hmachhawn tur hian Eintracht Frankfurt keeper Kevin Trapp, Arsenal keeper Bernd Leno leh Hoffenheim keeper Oliver Baumann te an awm. Keeper pathum tan hian tun ṭuma Spain leh Pathianni zana Switzerland an hmachhawn tur hi nakin zela squad-a an tel theih nan a pawimawh hle.

Kum 28 mi Leno hi June 20-a Brighton nen an inkhelh ṭuma inhliam vangin Arsenal-in FA Cup leh Community Shield an champion-naah pawh Emiliano Martínez-a'n goal a veng. Chutihrualin a theihna sang tak avanga si ban nghak tura thlan a nih chuan kum 30 mi Trapp tan ram tana khelh a harsa chho ang.

Trapp hian Paris Saint-Germain-ah khelhna hmun a chan loh hnuin Frankfurt-ah hmun pawimawh a chang leh tawh a; chutihrualin Germany-in keeper ṭha an ngah miau avangin ram tan vawi thum chiah a la inlan a, Baumann erawh a la khel lo thung.

Germany general manager Oliver Bierhoff chuan, "Bayern Munich hian Germnany-ah hmun pawimawh an chang. Club tana inhre ṭha sa an nih avangin ram pawhin ham ṭhatna tam tak kan seng a, an rilru a huaisen bawk," tiin Bayern player-te a fak.

Keeper Neuer bakah Joshua Kimmich leh Serge Gnabry te an awltir a, inhliam vanga season khel mumal lo Niklas Sule leh Leroy Sane te erawh koh an ni thung. Sule hi Hoffenheim tana Mizorama rawn zin tawh a ni a, Germany tlarhnungah hmun pawimawh chang tura beisei a ni.

Sane hi World Cup hnuhnung berah koh a ni a, Germany-in group stage an paltlang loh avangin Joachim Low sawisel nan ber hman a ni thung. Manchester City aṭanga Bavarians zawmtu hian ram tan vawi 21 a khelh tawhah goal nga a khung tawh a, inhliam vangin season khat tawp a inkhel mumal tawh loh avangin Sane dinhmun hriat a châkawm hle.

Nipui transfer-ah Germany player-te hming a lang hnem hle. Chelsea-in Timo Werner lak nan pound maktaduai 54 (€60m)  an sen hnuah  pound maktaduai 72-in Kai Havertz an lalut dawn. German hma tawng duhawm pahnih hi Joachim Low-a hnuaia bul ṭan ve ve tura beisei an ni.

Werner, Havertz, Sane leh Julian Brandt te chawm turin Toni Kroos leh Ilkay Gundogan te an awm a, Real Madrid midfielder hi a inlan a nih chuan ram tana vawi 98 a khelhna tur a ni ang.

Germany tlarhmate hi an lansarh avangin Thomas Muller awm lo hi a hriat loh. Chutihrualin Muller hian season ṭha tak a hmang a, Bundesliga-ah assist vawi 21 neiin record a siam - Low-a hote hi Spain hmaa an bil a nih ngat chuan Muller awm loh hi a ri ring khawp ang.

Spain-in Iker Casillas an neih lai chuan keeper hi an chakna ber a ni ṭhin a, David de Gea an awm hnuah an inchhuanna ni chhunzawm mah se an chak loh rukna tiin an sawi thung. 

De Gea hi Manchester United tana a khelh ṭhat lai pawhin Spain tan chetsual a ching hle. United keeper leh Spain keeper hi mi thu hmun ni siin mi hrang ang hiala sawi a ni ṭhin a, tunah erawh De Gea hi English club tan pawh a ti dik reng thei ta lo.

United-in De Gea elpui turin Sheffield United-a loan hmanga an kaltir Dean Henderson an chelh tawh a, Spanish keeper tan number 1 dinhmun chelh reng turin ram tana a khelh ṭhat tel hi a pawimawh hle. 

Chutihrualin Luis Enrique-a'n De Gea hi bul a ṭantir ngei ang em tih erawh a chiang lo a, United keeper thachhangdawltu hi khawvel keeper manto ber Kepa Arrizabalaga a ni. Chutihrualin Chelsea keeper hi a man aṭanga en chi a ni lo, Blues manager Frank Lampard-a'n tun nipuiah a thlakna tur a dap kual mek.

Spain buaina hi keeper-ah ringawt a ni lo, Euro 2008 leh 2012 bakah World Cup 2010 champion squad thlirin tun hma an pha ta lo tih a chiang hle. 

Germany hmachhawn tur Spain squad-ah hian Sergio Ramos chiahin goal 10 a khung tling a, Ramos hian goal 21 tehmeuh khung mah se defender a nih avangin Die Mannschaft tlarhnung tan buaina a tling lo. Chutihrualin Spain team hrim hrim erawh en châkawm tak an ni thung.

La Roja tlarhmaa awm Rodrigo hi Leeds United lak thar a ni a, ram tan goal riat a khung tawh. Bayern Munich treble champion puitu Thiago Alcantara an kawl a, Spanish midfielder hi a thiam hrim hrim bakah club zawng lai a nih avangin a khel en a châkawm zual.

Enrique hian Manchester City winger thar Ferran Torres, Barcelona forward Ansu Fati bakah Europa League-a Sevilla champion puitu Jesus Navas leh Sergio Reguilon te a ko. Kum 23 mi defender Reguilon hi transfer-ah thawm a la nei ring a, club liana khel tlak a ni em tih chu Germany lakah fiahin a awm ang.

Spain tana chanchin duhawm lo erawh Adama Traore-a'n Covid-19 hri a vei a, Wolves forward hian ram tana khelhna hun ṭha a neih chu coronavirus avangin a chan dawn a, Spain jersey ha turin a nghah leh rih a ngai dawn.