Sevilla-ah Rakitic a kir

Croatia midfielder Ivan Rakitic chuan Barcelona chhuahsanin a hmangaih hmasa Sevilla lam a pan a, Europa League champion tan hian kum li chhung khel turin contract a ziak.

Kum 32 mi midfielder manah hian Sevilla chuan pound maktaduai 1.3 an pe phawt a, a man hi pound maktaduai riat thlenga sang chho thei tura tih a ni. 

Swiss Super League club FC Basel aṭanga a career ṭantu midfielder hian kum 2007 khan Basel chhuahsanin Schalke 04 a zawm a, European football-ah hmelhriat a hlawh ṭan. 

Kum 2010-ah Sevilla pan zuiin kum 2014 khan Barcelona a zawm a, hetihlaia a man zat hi pound maktaduai 18-a ni. Barcelona tan a khelh chhungin player pawimawh ni mah se season hmasa lama a khelh dan enin a uai thla ve ṭan tawh niin a lang. 

Barcelona boss thar Ronald Koeman-a'n a ruahmannaa a tel loh thu a hrilh hnuah Rakitic hi a chhuak dawn tih a chiang tawh a, tunah chuan Europa League nomawi a lo chawipui tawh team lamah a kir dawn ta. 

Croatia international hian Barca-ah season ruk hun a hman chhungin nomawi chawi theih ang chu a chawi kim a, La Liga (4), Copa del Rey (4), Spanish Super Cup (2), Champions League (1), UEFA Super Cup (1) leh FIFA Club World Cup (1)-ah Catalan club hi a champion pui a ni. 

Barca tan a khelh chhungin match 310-ah a inlan a, goal 35 khungsakin assist vawi 42 a nei hman. Sevilla-a a hun hman hmasakah khan match 149 khelin goal 32 a khung a, assist vawi 41 a nei - statistics aṭanga teh chuan Sevilla-ah Barca aiin a khel ṭha zawk. 

Sevilla tana a khelh hmasak zawka a season (2013-14) hnuhnung berah Europa League nomawi a chawi a, he season bikah hian match 52 khelin goal 15 a khung a, assist vawi 18 a nei! Sevilla chuan, “Tunah chuan a in lamah a lo kir leh ta,” tiin an player hlui hi an lawm.