Serena chak laiin Venus a tla

US Open a nih tawh chuan Williams unau an langsar ṭhin. Champion tura rinkai Serena Williams-i'n harsatna nei loin hnehna a chang a, a unau upa zawk Venus erawh hneh nei loin a zinkawng a tawp nghal.

Nimin zing Flushing Meadows, New York-a inkhelah Serena hian a khingpui Kristie Ahn chu 7-5, 6-3 in a hneh a, set pahnihah hian a service vawi khat ve ve hloh mah se ṭum hnih a chhuhsak let ve ve leh thung avangin a chak.

Kum 38 mi Serena hian Open Era china Grand Slam champion hnem ber Margaret Court (24 titles) nih rual turin vawi khat champion chauh a mamawh tawh, anmahni ramah ngei record nih rual a châk hle ang.

Seeded pathumna Serena chuan, "Point khat chauh pawh hmuh belh tuma ka beih ṭhin dan kha ka lawm, tun hma lama chak duha tuihal Serena ang kha nih reng ka duh," tiin a sawi. American star hian major tournament final a khelh hnuhnung pathumah hnehna a chang lo, kuminah beisei a nei sang.

Inkhel dangah Venus Williams chu seeded 20-na Karolina Muchova lakah 6-3, 7-5 in a chak lo. Kum 40 mi Venus hian an rama inelna lian a hmachhawn tawh chinah hneh nei loa a tlak hmasak ber ṭum a tawng a ni.

Venus hnehtu Muchova tan US Open hi a awlsam ngai lo. 2018 khan tuna world number 1 nilai Ashleigh Barty nen third round-ah an intawng a, nikum khan third round-ah bawk Serena hmachhawn lehin a chak lo ve ve.

Kuminah tualchhung nula, vawi hnih champion tawh Venus a hmachhawn leh a, chak lo zawk tura ngaih ni mah se huaisen taka bei letin hnehna a chang. Second round-ah chuan seeded chang phak lo Anna Kalinskaya nen an inkhel leh ang.

Hmeichhe singles first round inkhel dangah Wimbledon leh French Open champion hlui Garbine Muguruza, Australian Open champion Sofia Kenin leh seeded pasarihna Madison Keys te pawhin an khingpui ṭheuh hnehin round sang zawk an inhlangkai ve bawk.

World number 1 hlui Kim Clijsters erawhin beisei ang result a nei lo. Belgium star hian tennis a chawlhsan hnuah a rawn kir leh a, wildcard pek niin US Open a khel. Mahse a match hmasa berah Ekaterina Alexandrova chu 3-6, 7-5, 6-1 in a ngam lo.