Lionel Messi: A ṭhat ngaiin a la ṭha reng em?

Barcelona board hnena chhuah a duh thu a thlen meuh chuan football khawvelin khaw dang a hawi thei lo a, transfer bazar titiah pawh Lionel Messi aia lian a awm thei lo.

Chutiang boruak karah chuan Manchester City an ri ve reng a, Premier League club hausa hi tun dinhmunah chuan Messi lalut thei dinhmuna an sawi rik rin ber an ni rih. 

Messi hian a free-a chhuah theih a beisei a, a beisei ang hian lo chhuak thei ta tehreng pawh ni se kum khata euro maktaduai 50 chuang hlawhtu forward lalut tur hian bank account lamah number a tam a ngai. 

Kum 33 mi ni tawh forward hian chuti taka sum tam 'thapna' nih chu a phu reng em? A kum zat ngaihtuahin football khawvelah hma hun thui tak a nei tawh loah a ngaih theih em? Zawhna tam tak a piang a, chhan vek sen lah a ni hek lo. 

Barcelona ropuina chanchin ziak dawn ila, "I tel ve ang a phek tinah..." tih ang maiin Messi hian Barca-ah hmun ropui a luah a, Catalan club tan hian match 731 khel tawha goal 634 khungin Barca tana khung hnem ber a ni. 

La Liga bikah match 485 khelin goal 444-a khung tawh a, Spanish top flight football-ah ani aia goal khung hnem thei an awm lo. A career-a a kum ṭha ber hman erawh kum 2012 daih tawh kha a ni a, Barca leh Argentina tan match 69-ah goal 91-a khung. 

Messi hian Barcelona tan nomawi 34 zet a chawi tawh a, heng zingah hian La Liga-a vawi 10-a champion leh Champions League nomawi vawi li a chawi chu a tel - Argentina tana goal khung hnem ber niin ram tan match 138-ah goal 70 a khung. 

Ballon d'Or  chawimawina vawi ruk dawnga midang zawng aia khawvela footballer ṭha ber dinhmun luah nguntu hi England legend Gary Lineker chuan, "Football khel tawh zinga ropui ber a ni," tiin a fak hial.

Messi nomawi hunna en chuan European club ṭha pangngai tak nomawi hunna emaw tih mai a awl a, a mimal chawimawina dawhkan en chuan a aia dawhkan ropui zawk hmuh beiseina zawng zawng a bo nghal thei. 

Mahse, City hian Messi an lei/lalut dawn a nih chuan hmana a ropuina ni loin tuna 'Messi' hi an lei tur chu a ni a, a record ropuizia hriat ni mah se tuna a thiamna hi an chhawr tur a nih miau avangin Messi meuh pawh rinhlelhna nen a en loh theih loh. 

Season hmasaa an goal khumng aṭang ringawta teh tur a nih chuan futsal team khat daih zet Messi chungah an intlar a, Robert Lewandowski (55 goals), Ciro Immobile (39), Cristiano Ronaldo (37), Romelu Lukaku (34) leh Timo Werner (34)-te chu Messi chungah an awm. 

Manchester City forward Raheem Sterling pawhin inelna hrang hrangah goal 31 khungin Messi nen an khung zat a inang a, midang khawih phak loha awm ṭhin Messi khan goal khung lama chung en a nei ta nual. 

Forward famkim tehna erawh goal khung lamah chauh ni loin ṭhiante tana an ṭangkaina a ni tel a, Messi hian season liam taah khan inelna hrang hrangah assist vawi 25 a nei - a goal khung nen chuan goal 56-a la thawkchhuak cheu tihna a ni. 

Messi hian La Liga bikah a ṭhiante khung tur vawi 21 a siamsak a, Barcelona midfielder hlui  Xavi-a'n  2008-09 season-a vawi 20 assist neia La Liga record a lo siam tawh chu a khum - hei mai a ni lo, La Liga-a goal leh assist 20 nei tling ve ve thei hmasa ber record a siam. 

Arsenal legend Thierry Henry chuan 2002-03 season khan goal 24 khungin assist vawi 20 a lo nei tawh a, French striker ropui hnua European top five league-a goal leh assist 20 nei tling ve ve thei hmasa ber chu Messi a ni. 

La Liga-a goal khung hnem ber nichunga a vawi sarih nana Pichichi Trophy dawngtu Messi hian league bikah goal 25-a khung a, Pichichi nomawi vawi sarih dawng thei hmasa ber a ni. 

Kum 12 liam ta khan Mallorca striker Dani Guiza-chuan goal 27 khungin Spanish top flight league top scorer dinhmun a luah a, Messi hi Guiza hnua goal 30 khung tling lo chunga Pichichi dawng thei hmasa ber a ni. 

Deportivo la Coruna striker hlui Diego Tristan chuan 2001-02 season khan goal 21 a khung a, La Liga top scorer a ni - Tristan hnua La Liga top scorer zinga goal khung tlem ber chu Messi a ni a, uanpui chi a ni lo. 

Mahse, touch, pass, dribble leh chance siam zat aṭanga en chuan Messi a la danglam lo - season khata goal 20-a khung tlin hmasak ber 2008-09 season aṭanga teh chuan La Liga leh Champions League bika season khata assist a ngah ber chu 2019-20 (24 assist) a ni. 

Minute 126 dan zela goal khung anga chhut chu 2008-09 hnua a goal khung ratio chhe ber ni mah se minute 68 dana goal emaw assist tal a neih ziah ratio chu season liam ta hmaa season 11-a a season li record aiin a ṭha zawk. 

Season hmasa khan Messi hian 2008-09 season hnua dribble succes rate a neih san ber 65% a tawng a, a pass dik zat 82% pawh hi namai lo tak a ni - 'Messi a chuai tawh' tia sawitu tan chuan inenfiah a ngai ang. 

Hriat tel tur chu Messi khelh dan hi a inthlak ve tawh tih hi a ni. Season dang ang thoin mual sir ding lamah awm mahse goal khung tura a laiah tlan lut loin striker hnungah a thlawptuah a ṭang tam zawk a, a tawi zawnga sawi chuan number 10 angin a khel ṭhin. 

Spanish football expert leh 'Lionel Messi and the Art of Living' tih lehkhabu ziaktu Andy West chuan, "Season dang zawng aiin a tawlh hnung a, attacking hmahruaitu ni ṭhin kha playmaker angin a awm a, a chhan berah chuan Barca player zingah chutiang hnathawk thei dang chu an awm lo a ni. 

"Mahse, a khelh dan enin number 10 attacking midfielder nichungin a career hi a hmang zo tawh dawn niin a lang," a ti a, "Tun hma chu a phak tawh kher lo mai thei a, mahse season liam ta en pawh khan tuma umphak rual lohin khawvela forward ṭha ber chu a la ni reng a ni," tiin a sawi zui. 

Season liam taa Messi number en ila, Andy West hian dawt a sawi lo tih a lang - tun hnai Barca team chhe ber ang hiala sawiah a khel tih hriat tel a ṭha a, season hman zawh tak kha 2013-14 season hnua nomawi chawi loa season an khar hmasak ber a ni.

Mahse, Messi hian thiamna lamah midang tih theih loh a la ti thei reng chungin amah rau rauah chuan tun hma angin a tha a za tawk tawh lo tih chu a chiang reng. West chuan, "Attacking midfielder anga a khelh hian a tha sen tam lutuk tur a veng a, midang zawng aia a la ṭhatna passing, dribbling leh shooting ti thei turin a pui a ni," a ti.

England legend Lineker chuan, "Tumahin kumkhua a daih theih loh a, Messi pawh a tha a zuai ve ṭan tiin a sawi theih. Eng anga player ṭha tan pawh 'hun' hi hneh theih a ni lo," a ti ve thung. 

A tawp nan chuan amah atchilhtu City boss Pep Guardiola-a'n Sergio Aguero chu a central striker enkawl tawha ṭha ber a nih leh nih loh an zawhna a chhanna hian a tawp kan khar ang - "Messi hi a ṭha ber chu a ni. Number nine, number 10, number 11, number seven, number six, number five, number four...ah a ṭha ber vek a ni."